රටක ජනගහනයෙන් අඩකටත් වඩා වැඩි පිරිසක් ආර්ථික ක්රියාවලියෙන් පිටත තබා ගනිමින් ශ්රී ලංකාවට තවදුරටත් ඉදිරියට යා නොහැකි බව කොකා-කෝලා (Coca-Cola) ශ්රී ලංකා ආයතනයේ හිටපු අධ්යක්ෂිකාවක මෙන්ම කාන්තා සවිබල ගැන්වීමේ උපදේශිකාවක වන කෞෂලී කුසුමපාල පවසයි.
කාන්තාවන්ගේ ආර්ථික සහභාගීත්වයේ වැදගත්කම පිළිබඳව අදහස් දක්වමින් ඇය පෙන්වා දෙන්නේ, වැඩි වශයෙන් කාන්තාවන් ශ්රම බලකායට එක් කර ගැනීම හුදෙක් ස්ත්රී පුරුෂ සමානාත්මතාවය පිළිබඳ කාරණයක් පමණක් නොව, සමස්ත රටේම දියුණුව වෙනුවෙන් පවතින සුවිශේෂී අවස්ථාවක් බවයි. කාන්තාවන්ට ආර්ථිකයට පූර්ණ වශයෙන් දායක වීමට අවස්ථාව සැලසුණු විට, එහි ප්රතිලාභ මෙරට වෙසෙන මිලියන 21ක් වූ සමස්ත ජනතාවටම හිමිවන බව ඇය අවධාරණය කරයි.
මේ සම්බන්ධයෙන් සිය ස්ථාවරය පැහැදිලි කරමින් කෞෂලී කුසුමපාල මෙසේ සඳහන් කර තිබේ.
“අපේ ජනගහනයෙන් 51%ක් කාන්තාවන්. නමුත් ඉන් විශාල පිරිසක් රටේ ඵලදායීතාවයට දායක වන්නේ නැහැ. ඒක තමයි සරල සත්යය. අපිට හොඳින් කාලා බීලා වඩාත් උසස් ජීවන තත්ත්වයක් ගත කරන්න ඕන නම්, අපේ ජනගහනයෙන් 100%ක්ම ඵලදායීතාවයට දායක විය යුතුයි. ඒක සංඛ්යාත්මකව පැහැදිලි දෙයක්. මගේ දැක්ම අනුව, ආර්ථික ප්රතිසංස්කරණ සිදුවීමට නම් පළමුව සමාජයීය ප්රතිසංස්කරණ ඇති විය යුතුයි. අපි හැමෝගෙම මූලික මානව අයිතිවාසිකම් සුරක්ෂිත වීමේ පදනම වන්නේත් ඒ ආර්ථික ප්රතිසංස්කරණයි. ඒ නිසා, මේක ‘පිරිමින්ට එරෙහිව කාන්තාවන්’ පිළිබඳ ප්රශ්නයක් නෙවෙයි.”
කාන්තාවන් ආර්ථික වශයෙන් සවිබල ගැන්වීම තුළින් පවුල් ඒකකය මෙන්ම සමස්ත ජාතික ආර්ථිකයම ශක්තිමත් වන බවත්, ඒ සඳහා සමාජ ආකල්පමය වෙනසක් අත්යවශ්ය බවත් ඇය පවසයි.
සටහන – කල්පනී ෂමල්කා
වැඩිදුර විස්තර
FromtheislandLK YouTube නාලිකාවේ වැඩසටහනකට එක්වෙමින් දැක්වූ අදහස් ඇසුරිනි




