කලාව යනු කිසිදු භූගෝලීය හෝ භාෂාමය සීමාවකට යටත් නොවන, සංවේදී හදවත් එකිනෙක යා කරන විශ්වීය මාධ්‍යයකි. එහෙත්, මෑතකදී සමාජ මාධ්‍ය අවකාශය දැඩි ලෙස කැලඹීමට ලක් කළ සිදුවීමක් වූයේ ප්‍රවීණ ගායන ශිල්පී අජිත් මුතුකුමාරණගේ අතිශය ජනප්‍රිය “ඇස යොමන තැනක” ගීතයට පැනවුණු හදිසි වාරණයයි. අදාළ ගීතයේ පද රචිකාවිය විසින් එන්තරවාසියක් නිකුත් කරමින් සඳහන් කර තිබුණේ, යම් හෙයකින් එම ගීතය යළි වේදිකාවේ ගායනා කළහොත් රුපියල් මිලියන 10ක (කෝටියක) වන්දියක් අය කර ගන්නා බවයි. මෙම නීතිමය ගැටලුවත් සමඟ අජිත් මුතුකුමාරණ තීරණය කළේ අදාළ ගීතයේ පූර්ණ අයිතිය එම පාර්ශ්වයට පවරා දී, මින් ඉදිරියට කිසිදු ප්‍රසංගයකදී එම ගීතය ගැයීම නවත්වාලීමටය.
කෙසේ වෙතත්, මෙම අභියෝගය හමුවේ අසරණ වනවා වෙනුවට කලාකරුවා ඊට ලබා දුන්නේ අතිශය නිර්මාණාත්මක සහ බුද්ධිමත් පිළිතුරකි. එම බාධකය ජය ගැනීම සඳහා ඔහුට පිටුපසින් ශක්තියක් වූයේ, මීට දශක තුනකට පමණ පෙර ජෝර්ජ් සේනානායක මහතා නිර්මාණය කළ අදාළ තනුවම පදනම් කරගනිමින්, ඊට අලුත්ම පද පෙළක් එකතු කළ ඔහුගේ ආදරණීය දියණිය මෙන්ම දක්ෂ ගීත රචිකා අංජනා මුතුකුමාරණ ය. ඇයගේ පද රචනයෙන් හැඩවුණු “සිත හඬන රෑයක” නව ගීතය මේ වන විට කලා ලෝකයේ දැඩි කතාබහට ලක්ව තිබේ.
ප්‍රශ්න හමුවේ පසුබට නොවී, කලාත්මක නිර්මාණයකින්ම ඊට පිළිතුරු දිය යුතුය යන සංකල්පය පෙරදැරි කරගනිමින් අංජනා මෙම ගීතය රචනා කර ඇත. අහිමි වූ ප්‍රේමයක වේදනාව, හුදකලාව සහ මගහැරුණු මතකයන් පරණ තනුවට අපූරුවට ගැළපෙන පරිදි ඇය විසින් ගොතනු ලැබූ ආකාරය අතිශයින් ප්‍රශංසනීය වේ. එම ගීතයේ පද පෙළ මෙසේය.
සිත හඬන රෑයක මා නෙතු නවතින්නේ ඔබ ළඟයි
ඉකිබිඳින වෙලේ හැමතැනකම මැවුනේ ඔය රුවයි
හද තැවෙන වෙලේ සැනසුම මට වුනේ ඔබ තමයි
හැරගියේ ඇයිද තවමත් මම නොදනිමි සත්තයි.
වාණිජමය බාධා හා නීතිමය අභියෝග හමුවේ කලාව යම් පීඩනයකට ලක්වන යුගයක, තම පියාගේ කලා දිවියට ශක්තියක් වෙමින් අංජනා මුතුකුමාරණ තමන්ගේ ප්‍රතිභාවෙන් ඉදිරිපත් කළ මෙම අපූරු පිළිතුර සැබැවින්ම අගය කළ යුත්තකි. කෝටියක වන්දි තර්ජනවලට බිය නොවී, නිර්මාණාත්මක මඟකින් කලාව වෙනුවෙන් පෙනී සිටි ඇය වෙත මේ වන විට මෙරට කලාකාමී රසික ජනතාවගෙන් දැඩි ආදරයක් සහ ප්‍රශංසාවක් හිමිවෙමින් පවතී.
සටහන
කල්පනී ෂමල්කා