ප්‍රකට සමාජ මාධ්‍ය පෞරුෂයක් වූ නයෝමි චං (Nayomi Chan) දරු ප්‍රසූතියකදී ඇති වූ සංකූලතා හේතුවෙන් හදිසියේ ජීවිතක්ෂයට පත් වීම සම්බන්ධයෙන් කාන්තා හා ළමා කටයුතු අමාත්‍ය සරෝජා සාවිත්‍රි පෝල්රාජ් සිය දැඩි ශෝකය ප්‍රකාශ කර තිබේ.
ඇයගේ පවුලේ සාමාජිකයින් විසින් තහවුරු කර ඇති ආකාරයට, නයෝමි චං මියගොස් ඇත්තේ දරු ප්‍රසූතියට අදාළ සංකූලතා හේතුවෙනි.
විශේෂ නිවේදනයක් නිකුත් කරමින් අමාත්‍යවරිය පවසා ඇත්තේ, කාන්තාවන්, දැරියන් සහ තරුණ පරපුර අතර සමාජීය වශයෙන් යහපත් බලපෑමක් ඇති කිරීම සඳහා නයෝමි චං තම සමාජ මාධ්‍ය ජනප්‍රියත්වය භාවිත කළ ආකාරය තමා අගය කරන බවයි. හුදු ප්‍රසිද්ධිය සහ පිළිගැනීම පසුපස හඹා යෑමෙන් ඔබ්බට ගිය ඇය, වැදගත් සමාජ ප්‍රශ්න පිළිබඳව සමාජය දැනුවත් කිරීමට තම ජාලයන් සහ වේදිකාව භාවිත කළ බවද අමාත්‍යවරිය සිහිපත් කර සිටියි.
නයෝමි චං විසින් බෙදාහදා ගන්නා ලද වීඩියෝවක් සිහිපත් කළ අමාත්‍ය සරෝජා සාවිත්‍රි පෝල්රාජ්, කාන්තාවන්ගේ ආරක්ෂාව සහ කාන්තාවන් ආරක්ෂා කිරීමේ සමාජ වගකීම පිළිබඳව ඇය ඉතා සරල එහෙත් අර්ථවත් අයුරින් කතා කළ ආකාරය තමාට සිහිපත් වන බව පැවසුවාය.
එමෙන්ම, නයෝමි චංගේ වියෝවෙන් දැඩි ශෝකයට පත්ව සිටින ඇයගේ පවුලේ සාමාජිකයින්ට අමාත්‍යවරිය සිය බලවත් සංවේගය ප්‍රකාශ කරමින්, මෙම අපහසු අවස්ථාවට මුහුණ දීමට ඔවුන්ට ශක්තිය හා ධෛර්යය ප්‍රාර්ථනා කළාය.
උපුටාගැනීම –
“තම සමාජ මාධ්‍ය ජනප්‍රියත්වය ප්‍රසිද්ධියට සීමා නොකර, විශේෂයෙන්ම කාන්තාවන්, ගැහැණු දරුවන් සහ තරුණ ප්‍රජාව තුළ ධනාත්මක සමාජ බලපෑමක් ඇති කිරීම සඳහා යොදාගත් නයෝමි චං සොයුරියගේ අභාවය පිළිබඳව මාගේ බලවත් ශෝකය පළ කරමි.කාන්තාවන් සමාජය තුළ ආරක්ෂා වීමේ වැදගත්කම සහ ඒ වෙනුවෙන් සමාජයක් ලෙස අප සතු වගකීම පිළිබඳව ඇය වරක් ඉතා සරලව නමුත් අරුත්බරව සිදුකළ වීඩියෝවක් තුළින් ඇය පිළිබඳ මතකයක් මා තුළ රැඳී තිබේ.
මෙම අසීරු මොහොතේ ඇගේ පවුලේ සියලුදෙනාට මෙම වියෝව දරාගැනීමට අවශ්‍ය ශක්තිය හා ධෛර්යය ප්‍රාර්ථනා කරමි ! ”
– උපුටාගැනීම අවසන්