ඕස්ට්‍රේලියාව සහ නවසීලන්තය හරහා ගමන් කිරීම සඳහා අවශ්‍ය සංක්‍රමණ වීසා බලපත්‍ර (Transit Visas) ලබා ගැනීමට නොහැකි වීම හේතුවෙන්, 2023 වසරේ සිට කුක් දූපත්හි (Cook Islands) සිරවී සිටින ශ්‍රී ලාංකික කාන්තාවක් යළි මව්බිමට පැමිණීම සඳහා දැඩි පරිශ්‍රමයක නිරතව සිටී. තමාට මව්බිමට යාමට හැකි වන අයුරින් බලධාරීන් ඒත්තු ගැන්වීම සඳහා අවම වශයෙන් අත්අඩංගුවට පත් වීමකට වුවද තමා සූදානම් බව ඇය ප්‍රකාශ කර ඇති බව ‘කුක් දූපත් නිව්ස්’ (Cook Islands News) ආයතනය අනාවරණ කර තිබේ.
මෙම 49 හැවිරිදි කාන්තාව කුක් දූපත්වල වැඩම ජනගහනයක් ජීවත් වන රරොටොංගා (Rarotonga) දූපතේ ජීවත් වන අතර, එරට ආගමික හා විදේශ සංක්‍රමණ නීති යටතේ ඇය මේ වන විට වීසා කාලය ඉක්මවා රැඳී සිටින අයෙකු ලෙස සැලකේ. කෙසේ වෙතත්, ඕස්ට්‍රේලියාව හෝ නවසීලන්තය තම භූමිය හරහා ගමන් කිරීමට ඇයට අවසර ලබා දෙන්නේ නම් මිස, කුක් දූපත් ආගමන විගමන අංශයට ඇයගේ පිටත්ව යාම පහසු කළ නොහැකි වී තිබේ.
‘Cook Islansd News’ වාර්තා කළ ආකාරයට, නවසීලන්ත ආගමන විගමන අංශය ප්‍රකාශ කර ඇත්තේ අදාළ කාන්තාව නවසීලන්තය හරහා ගමන් කිරීමට අදහස් කරන බවට තමන් විශ්වාස නොකරන බවයි. කෙසේ වෙතත්, ඕස්ට්‍රේලියානු ස්වදේශ කටයුතු දෙපාර්තමේන්තුව ඇයගේ පුද්ගලික නඩුව සම්බන්ධයෙන් අදහස් දැක්වීමෙන් ප්‍රතික්ෂේප කර ඇත.
ඕස්ට්‍රේලියාවට ඇතුළු වීමට හෝ එහි රැඳී සිටීමට අපේක්ෂා කරන ඕනෑම විදේශිකයෙක්, 1958 සංක්‍රමණ පනතේ සහ 1994 සංක්‍රමණ රෙගුලාසිවල අවශ්‍යතා සපුරාලිය යුතු බව ඕස්ට්‍රේලියානු දෙපාර්තමේන්තුව පවසා තිබේ.
වාර්තා වන ආකාරයට ඇය හොංකොං හිද වසරක් පමණ සේවය කර ඇත. පසුව 2023 මාර්තු මාසයේදී නවසීලන්ත වැඩ වීසා (work visa) බලපත්‍රයක් ලබා ගෙන ඇත. සිය ඉල්ලීම සලකා බැලෙමින් තිබියදී, තමාට උදව් කළ නීතිඥයෙකු නවසීලන්තයෙන් පිටව ගොස් පසුව ආපසු පැමිණෙන ලෙස උපදෙස් දුන් බව ඇය ප්‍රකාශ කර තිබේ.
කුක් දූපත් ප්‍රවෘත්ති විසින් සමාලෝචනය කරන ලද විද්‍යුත් තැපැල් හුවමාරුවලට අනුව, නවසීලන්ත වැඩ බලපත්‍රයක් ලබා ගැනීමට ඇය ‘Immigration and Secretarial Services’ ආයතනය භාවිතා කර ඇත. එම සමාගමේ සේවාවන් සඳහා ඇය ඇමරිකානු ඩොලර් 20,000 කට ආසන්න මුදලක් ගෙවා ඇති බව පවසා ඇත.
සමාගමේ අධ්‍යක්ෂවරිය වන සිල්වියන් ගැලන්ට් (Sylviane Gallant) 2024 පෙබරවාරි මාසයේදී අදාළ කාන්තාවට දන්වා ඇත්තේ ඇයගේ නඩුව නවසීලන්ත ආගමන විගමන අංශය සතුව පවතින බවත්, නීතිමය ආධාර පතන ලෙසත් උපදෙස් දී ඇති බවයි.
පසුකාලීනව ඇය ටහීටි (Tahiti) හරහා ගමන් කිරීමට ද උත්සාහ කර ඇති නමුත් එම විකල්පයද ප්‍රතික්ෂේප වී තිබේ. අවශ්‍ය ක්‍රියා පටිපාටි අනුගමනය කරන්නේ නම්, නැවකින් හෝ පිටව යාමට තමා සූදානම් බව ඇය පවසා ඇත.
විවිධ ආගමන විගමන නීති අතර සිරවීම හේතුවෙන් පුද්ගලයෙකු මුහුණ දෙන දැඩි දුෂ්කරතා ද මෙම සිදුවීම මගින් මනාව පැහැදිලි වන අතර, ඇයට යළි මව්බිමට පැමිණීම සඳහා සුදුසු මාර්ගයක් සොයාගැනීම අත්‍යවශ්‍ය වී තිබේ.
සටහන | කල්පනී ෂමල්කා
මූලාශ්‍රය Dailymirror.lk