මොරටුව විශ්වවිද්‍යාලයේ ඉංජිනේරු පීඨයේ පරිගණක විද්‍යා හා ඉංජිනේරු විද්‍යා දෙපාර්තමේන්තුවේ මහාචාර්ය දුලානි මීදෙණිය, ලෝකයේ වඩාත්ම කීර්තිමත් පර්යේෂකයන් ඇතුළත් Stanford–Elsevier World’s Top 2% Scientists List 2026 නාමාවලියට ඇතුළත්ව තිබේ.
ස්ටැන්ෆර්ඩ් විශ්වවිද්‍යාලය සහ Elsevier ආයතනය එක්ව සකස් කරන මෙම වාර්ෂික ශ්‍රේණිගත කිරීම මඟින්, ප්‍රමිතිගත උපුටා දැක්වීම් දර්ශක පදනම් කරගනිමින් ගෝලීය වශයෙන් ඉහළම බලපෑමක් කරන ලද පර්යේෂකයන් හඳුනා ගනු ලබයි. විද්‍යාත්මක ක්ෂේත්‍ර 22ක් සහ උප ක්ෂේත්‍ර 174ක් ඔස්සේ සකස් වන මෙම දත්ත සමුදාය මඟින්, පර්යේෂකයෙකුගේ සමස්ත ශාස්ත්‍රීය වෘත්තීය දිවිය මෙන්ම එකම වසරක් තුළ සිදුකළ පර්යේෂණවල බලපෑම ද ඇගයීමට ලක් කරයි. මෙහිදී හුදෙක් ප්‍රකාශිත පර්යේෂණ පත්‍රිකා සංඛ්‍යාව පමණක් නොව, උපුටා දැක්වීම් ගණන, සහ-ලේඛකත්වය සහ ලේඛකයාගේ දායකත්වය යන කරුණු සැලකිල්ලට ගනිමින් පර්යේෂණවල ගුණාත්මකභාවය සහ බලපෑම කෙරෙහි වැඩි අවධානයක් යොමු කර ඇත.
කෘත්‍රිම බුද්ධිය, Deep Learning, පරිගණක දෘශ්‍යකරණය, Agentic AI සහ මෘදුකාංග ඉංජිනේරු විද්‍යාව යන ක්ෂේත්‍රයන්හි ප්‍රමුඛ පෙළේ විද්වතෙකු වන මහාචාර්ය මීදෙණිය, එක්සත් රාජධානියේ ශාන්ත ඇන්ඩෲස් විශ්වවිද්‍යාලයෙන් පරිගණක විද්‍යාව පිළිබඳ ආචාර්ය උපාධිය ලබා ඇත. ඇය එක්සත් රාජධානියේ වරලත් ඉංජිනේරුවරියක සහ උසස් අධ්‍යාපන ඇකඩමියේ සාමාජිකාවක වන අතර, IEEE ආයතනයේ ජ්‍යෙෂ්ඨ සාමාජිකාවක මෙන්ම ACM සහ IET යන ජාත්‍යන්තර ආයතනයන්හි ද සාමාජිකාවකි.
ඉගැන්වීම් කටයුතු, පර්යේෂණ අධීක්ෂණය, පාඨමාලා සංවර්ධනය සහ ශාස්ත්‍රීය ප්‍රකාශන ඔස්සේ මහාචාර්ය මීදෙණිය මොරටුව විශ්වවිද්‍යාලයට මෙන්ම පුළුල් පර්යේෂණ ක්ෂේත්‍රයට ද නොමැකෙන මෙහෙවරක් ඉටු කර ඇත. ස්ටැන්ෆර්ඩ්-එල්සෙවියර් නාමාවලියට ඇගේ නම ඇතුළත් වීම මඟින් ඇගේ පර්යේෂණවල ජාත්‍යන්තර ප්‍රමිතිය සහ ශ්‍රී ලංකාව තුළ මෙන්ම ගෝලීය වශයෙන් නවෝත්පාදනයන් ඉදිරියට ගෙන යාමට ඇය දක්වන දායකත්වය මනාව පිළිඹිබු වේ.
මොරටුව විශ්වවිද්‍යාලයේ cse.mrt.ac.lk වෙබ් පිටුව ඇසුරින්
සටහන | කල්පනී ෂමල්කා