මස්ක් මට ශුක්රාණු පරිත්යාග කළා! OpenAI හිටපු අධ්යක්ෂිකාවගේ හෙළිදරව්ව ලෝකයම කැළඹෙයි
(Lakvahini) – එලොන් මස්ක් සහ OpenAI ආයතනය අතර පවතින නීතිමය අරගලයේ තීරණාත්මක සාක්ෂිකාරියක වන ශිවොන් සිලිස් (Shivon Zilis), මස්ක් සමඟ පවතින අසාමාන්ය පවුල් සබඳතාව සහ සමාගමේ ව්යුහය වෙනස් කිරීම සම්බන්ධයෙන් වූ අභ්යන්තර සාකච්ඡා පිළිබඳව ෆෙඩරල් අධිකරණය හමුවේ සාක්ෂි ලබා දුන්නාය.
OpenAI හි හිටපු අධ්යක්ෂ මණ්ඩල සාමාජිකාවක වන සිලිස් ප්රකාශ කළේ, මස්ක් සමඟ පැවති කෙටි කාලීන ප්රේම සබඳතාව පසුව දරුවන් සිව්දෙනෙකු සහිත “සම-දෙමාපිය” (Co-parenting) සබඳතාවක් දක්වා වර්ධනය වූ බවයි.
පෞද්ගලික සබඳතාව සහ රහස්යභාවය
තමන් මව් පදවිය ලැබීමට දැඩි කැමැත්තකින් පසුවූ බවත්, 2020 වසරේදී මස්ක් විසින් ඒ සඳහා ශුක්රාණු පරිත්යාග කිරීමට ඉදිරිපත් වූ බවත් සිලිස් අධිකරණයට ප්රකාශ කළාය. සෞඛ්ය හේතූන් මත සාම්ප්රදායික විවාහයක් තුළින් දරුවන් ලැබීමේ අපහසුතාවයක් තමන්ට තිබූ බවද ඇය සඳහන් කළාය.
මුලදී මෙම දරුවන්ගේ පීතෘත්වය රහසක්ව තබා ගැනීමට දෙපාර්ශවයම එකඟ වී තිබුණි. ඒ අනුව, OpenAI ප්රධාන විධායක නිලධාරී සෑම් ඇල්ට්මන් හට පවා මස්ක් දරුවන්ගේ පියා බව තමන් දැනුම් නොදුන් බවත්, එම තොරතුරු හෙළි කළේ 2022 වසරේදී ඒ පිළිබඳ පුවතක් පළවීමට ආසන්න වූ විට බවත් ඇය පැවසුවාය. වර්තමානය වන විට මස්ක් සිය දරුවන් සමඟ සතියකට පැය කිහිපයක් ගත කරමින් ඔවුන්ගේ ජීවිතවලට සක්රීයව දායක වන බව ඇය වැඩිදුරටත් කියා සිටියාය.
OpenAI පාලනය පිළිබඳ ගැටුම
නඩු විභාගයේදී ඉදිරිපත් වූ සාක්ෂිවලට අනුව, OpenAI ආයතනය ලාභ නොලබන මට්ටමින් ඔබ්බට ගෙන යාම සඳහා වූ සාකච්ඡාවලදී මස්ක් තීරණාත්මක භූමිකාවක් ඉටු කර ඇත. 2017 වසරේ සිටම බිලියන සංඛ්යාත ආයෝජන ලබා ගැනීම සඳහා සමාගමේ ව්යුහය වෙනස් කිරීමේ අවශ්යතාවය මතු වී තිබූ බව අධිකරණයේදී හෙළි විය.
එහිදී මස්ක් විසින් OpenAI හි වැඩි පාලන බලයක් ඉල්ලා ඇති අතර, එය ඔහුගේ ‘ටෙස්ලා’ (Tesla) සමාගමේ අනුබද්ධිත ආයතනයක් ලෙස ඒකාබද්ධ කිරීමට ද යෝජනා කර ඇත. සිලිස් විසින් එවන ලද එක් විද්යුත් පණිවුඩයක සඳහන් වූයේ එවැනි පියවරක් මගින් සමාගමේ මූල්ය ගැටලු වහාම විසඳෙනු ඇති බවයි. කෙසේ වෙතත්, සෑම් ඇල්ට්මන් ඇතුළු පිරිස මස්ක් හට සමාගමේ තාක්ෂණය සහ දිශානතිය පාලනය කිරීමට ඉඩ දීම ප්රතික්ෂේප කර ඇති බව ලේඛන මගින් අනාවරණය විය.
වෘත්තීය භූමිකාව
සිලිස් OpenAI හි පමණක් නොව මස්ක්ගේ ‘ටෙස්ලා’ සහ ‘නියුරාලින්ක්’ (Neuralink) යන සමාගම්වල ද ප්රධාන තනතුරු හොබවා ඇත. OpenAI හි නීතිඥයින් ඇය මස්ක් වෙත තොරතුරු ලබා දුන් බවට ඉඟි කළ ද, ඇය පවසා සිටියේ තමන් දෙපාර්ශවයේම විශ්වාසය දිනා ගනිමින් කටයුතු කළ බවයි.
මස්ක් සිය නවතම AI සමාගම වන ‘xAI’ දියත් කිරීමට කෙටි කාලයකට පෙර, එනම් 2023 මාර්තු මාසයේදී සිලිස් OpenAI අධ්යක්ෂ මණ්ඩලයෙන් ඉල්ලා අස්වූවාය. මෙම නඩු විභාගය මගින් සිලිකන් නිම්නයේ ප්රමුඛ පෙළේ සමාගම්වල පාලනය සම්බන්ධයෙන් පවතින ගැටුම් තවදුරටත් කරළියට පැමිණෙමින් තිබේ.
lakvahini