ආසියානු වෙරළ ක්රීඩා උලෙළ ඉතිහාසයේ කබඩි ක්රීඩාවෙන් පළමු රිදී පදක්කම දිනා ගැනීමට ශ්රී ලංකා කාන්තා කණ්ඩායම ඊයේ සමත් විය.
කාන්තා කබඩි ඉසව්වේ රන් පදක්කම වෙනුවෙන් ඊයේ ප්රබල ඉන්දියාවට එරෙහිව තරග බිමට පිවිසි ශ්රී ලංකා කණ්ඩායම තරගයේ පළමු භාගයේදී ප්රතිවාදීන්ට ප්රබල සටනක් දීමට සමත් විය. එම වටය නිමා වන විට ඉන්දියාව ඉදිරියෙන් සිටියේ ලකුණු 20-18ක් ලෙසනි. කෙසේ වෙතත් දෙවැනි වටයේ ආක්රමණශීලි ක්රීඩා රටාවක නිරත වූ ඉන්දීය පිල ලකුණු 27ක් රැස් කරද්දී ශ්රී ලංකා පිලට ලබාගත හැකි වූයේ ලකුණු 13ක් ලෙසිනි. ඒ අනුව ඉන්දියාව ලකුණු 47-31ක් ලෙස රන් පදක්කම දිනා ගත්තේය. ඉන්දීය කාන්තා පිල මේ ක්රීඩා උලෙළේ කබඩි ඉසව්වේ රන් පදක්කම දිනාගත්තේ අඛණ්ඩව 6 වැනි වරටය. අවසන් පූර්ව තරග ද්විත්වයෙන් පරාජය වූ බංග්ලාදේශය තෙවැනි වරටත්, නේපාලය පළමු වරටත් ලෝකඩ පදක්කම් දිනා ගත්තේය.
ශ්රී ලංකා කණ්ඩායමට දිලුක්ෂණා විමලෙන්තිරන්, හංසිකා කුමුදිනි, කජෙන්තිනි රාජා, මධුරිකා හංසමාලි, ප්රියවර්ණා රසතුරෙයි සහ ශානිකා සුදර්ශනී ඇතුළත් වූ අතර, මධුරිකා නායිකාව ලෙස කටයුතු කළාය.
“මේ ජයග්රහණය ගැන සතුටුයි. පළමු වරටයි අවසන් තරගයට පිවිසියේ. අපි උත්සාහ කළා රන් පදක්කම දිනන්න. ඒත් අවාසනාවන්ත ලෙස එය මඟහැරුණා. ඊළඟ තරගාවලියේදී රන් පදක්කම දිනන්න උත්සහ කරනවා. ඒ වගේම ආසියානු ක්රීඩා උලෙළේදී ඉන්දියාවට ලොකු තරගයක් ලබා දීමට බලාපොරොත්තු වනවා. මෙය ආසියානු ක්රීඩා තරගාවලියක ලබාගත් පළමු රිදී පදක්කමයි. ඒ නිසා සතුටුයි.” ජයග්රහණයෙන් අනතුරුව නායිකාව පැවසුවාය.
මේ අතර පිරිමි අවසන් පූර්ව වටයේ පළමු තරගයේදී ඉරානය හමුවේ පරාජය වීමෙන් ශ්රී ලංකා පිලට ලෝකඩ පදක්කම හිමි විය. දෙවැනි අවසන් පූර්ව තරගයේදී ඉන්දියාව හමුවේ පරාජය වූ පාකිස්තානයත් ලෝකඩ පදක්කමට හිමිකම් කියද්දී මේ ඉසව්වේ අවසන් තරගයේදී ඉන්දියාව පරාජය කරමින් ලකුණු 44-31ක ලෙස රන් පදක්කම දිනා ගැනීමට ඉරානය සමත් විය. අවසන් තරගාවලි 4 තුළදී ඉරානය දිනාගත් තෙවැනි රන් පදක්කම මෙයයි. ඉන්දියාව අඛණ්ඩව දෙවැනි වරටත් රිදී පදක්කම දිනාගත් අතර, ශ්රී ලංකාවට ලෝකඩ පදක්කම හිමි වූ සිව්වැනි අවස්ථාව මෙයයි. ශ්රී ලංකා කබඩි පිරිමි කණ්ඩායමට මිලින්ද චතුරංග, සමින්ද සන්තුෂ්, ඩිලාන් සංජය, රුවන් සමරකෝන්, මොහොමඩ් අන්සාෆ් සහ අබිත් අකාර් ඇතුළත් වූහ.
මේ සමඟ මෙවර ක්රීඩා උලෙළේදී ශ්රී ලංකාව දිනාගත් පදක්කම් සංඛ්යාව 6 දක්වා ඉහළ ගිය අතර, පදක්කම් සටහනේ 11 වැනි ස්ථානයට පත්ව තිබිණි. මින් පෙර මලල ක්රීඩාවෙන් රිදී පදක්කමක් සහ ලෝකඩ පදක්කම් 3ක් ශ්රී ලංකාවට හිමි විය. මේ ක්රීඩා උලෙළේ වෙරළ මල්ලවපොර ඉසව්ව අද ආරම්භ වීමට නියමිත අතර, ශ්රී ලංකාවෙන් ක්රීඩකයන් දෙදෙනකු සහ ක්රීඩිකාවන් දෙදෙනකු තරග බිමට පිවිසෙති.
නිරෝෂාන් ප්රියංකර