හොලිවුඩ් තාරකාවන්ගේ සිට සාමාන්‍ය සමාජය දක්වා වේගයෙන් බර අඩු කරගැනීමේ ‘මැජික් ඖෂධයක්’ ලෙස ප්‍රචලිත වූ Ozempic, Wegovy සහ Mounjaro වැනි GLP-1 ඖෂධ කාණ්ඩය අද වන විට ලොව පුරා දැවැන්ත කතිකාවක් නිර්මාණය කර තිබේ. ඇසිපිය හෙළන සැණින් ශරීරයේ බර පාලනය කරගත හැකි වුවද, එමඟින් නිර්මාණය වන අනපේක්ෂිත ශාරීරික අර්බුදයක් පිළිබඳව ජාත්‍යන්තර වෛද්‍ය ක්ෂේත්‍රයේ අවධානය යොමුව ඇත.
ඇමරිකානු ප්ලාස්ටික් ශල්‍ය වෛද්‍ය සංගමය (ASPS) නිකුත් කළ නවතම දත්ත වාර්තාවන්ට අනුව, මෙම ඖෂධ භාවිතයෙන් පසු එල්ලා වැටෙන සම සකස් කරගැනීම සඳහා ශල්‍යකර්ම වෙත යොමුවන රෝගීන්ගේ සංඛ්‍යාව වාර්තාගත ලෙස ඉහළ ගොස් තිබේ.
‘ඔසෙම්පික් මුහුණ’ සහ වියපත් වන පෙනුම
ශරීරයේ බර අතිශය කෙටි කාලයක් තුළ වේගයෙන් අඩු වීමේදී, සමට ඊට සමගාමීව සංකෝචනය වීමට ප්‍රමාණවත් කාලයක් නොලැබේ. විශේෂඥ වෛද්‍යවරුන් පෙන්වා දෙන්නේ මේ සමඟ මුහුණේ සහ බෙල්ලේ මේද ස්ථර ක්ෂය වී සම රැළි වැටී වියපත් පෙනුමක් (Ozempic Face) නිර්මාණය වන බවයි.
එක්සත් ජනපදයේ ප්ලාස්ටික් ශල්‍ය වෛද්‍යවරුන්ගෙන් 80%කට අධික පිරිසක් වෙත පැමිණෙන රෝගීන්ගේ ප්‍රධාන ඉල්ලීමක් බවට පත්ව ඇත්තේ, මෙම ඖෂධ භාවිතයෙන් පසු බුරුල් වූ සම යථා තත්ත්වයට පත් කරගැනීමේ ප්‍රතිකාරයි. ඉහළ සිරුර, ගෙල, දෑත් සහ කලවා ප්‍රදේශ එසවීමේ (Lifting procedures) ශල්‍යකර්ම සඳහා වන ඉල්ලුම 20%කට වැඩි ප්‍රමාණයකින් වර්ධනය වී ඇත්තේ එබැවිනි.
පරිණත සමාජයට සහ දේශීය පරිසරයට පාඩමක්
මෙම ප්‍රවණතාව විශේෂයෙන්ම වයස අවුරුදු 45 ඉක්මවූ පරිණත පුද්ගලයින්ට වඩාත් සංවේදී සාධකයකි. වයසත් සමඟ සමේ කොලැජන් (Collagen) ප්‍රතිශතය ස්වාභාවිකවම අඩු වන බැවින්, මෙවැනි කෘත්‍රිම ඖෂධ හරහා එකවර බර අඩු කරගැනීමට යාමෙන් සිරුර සෞඛ්‍ය සම්පන්න වනවා වෙනුවට ශාරීරිකව සහ මානසිකව පීඩාවට පත්වීමේ අවදානමක් පවතී.
ශ්‍රී ලංකාව තුළද දියවැඩියාව සඳහා ලබා දෙන මෙවැනි ඖෂධ, වෛද්‍ය උපදෙස්වලින් තොරව බර අඩු කරගැනීම සඳහා භාවිත කිරීමට ඇතැම් පිරිස් පෙළඹෙන ප්‍රවණතාවක් පෙනෙන්නට තිබේ. එහෙත් ක්ෂණික විසඳුම් පිටුපස ඇති සංකූලතා සහ ශල්‍යකර්මවලට මුහුණ දීමට සිදුවන පිරිවැය සුළුපටු නොවන බව සමාජ නිරීක්ෂකයෝ පෙන්වා දෙති.
සැබෑ සුවතාව යනු ක්ෂණික කෙට්ටු වීම නොවේ
ප්ලාස්ටික් ශල්‍ය වෛද්‍ය සංගමයේ සභාපති වෛද්‍ය සී. බොබ් බාසු (Dr. C. Bob Basu) සඳහන් කරන්නේ, ඖෂධ මඟින් බර අඩු කරගැනීම ගමනක එක් අදියරක් පමණක් බවත්, බොහෝ දෙනෙකුට ඉන් පසු සිරුරේ සමතුලිතතාව ආරක්ෂා කරගැනීම අභියෝගයක් වන බවත්ය.
නිරෝගී දිගු ආයු කාලයක් යනු දින කිහිපයකින් කෙට්ටු වීම නොවේ. සමබර ආහාර රටාව, ස්වාභාවික ව්‍යායාම සහ ක්‍රමවත් ජීවන රටාවක් මඟින් ස්වාභාවිකව සිරුරේ හැඩය සහ සමේ නිරෝගීභාවය ආරක්ෂා කර ගැනීම වඩාත් ආරක්ෂිත මෙන්ම තිරසාර මාර්ගයයි.
වැඩිදුර තොරතුරු සහ මූලාශ්‍ර:
Yahoo News විද්‍යා වාර්තාව: The Ozempic Boom Is Driving a New Plastic Surgery Trend
ඇමරිකානු ප්ලාස්ටික් ශල්‍ය වෛද්‍ය සංගමයේ නිල දත්ත වාර්තාව: American Society of Plastic Surgeons – 2025 Trends & GLP-1 Impact
උපුටාගැනීම
Theleader.lk