විදේශ රැකියාවක් සඳහා 2012 වසරේදී සෞදි අරාබිය බලා පිටත්ව ගිය ශ්‍රී ලාංකික කාන්තාවක් වසර 14ක කාලයක සිට කිසිදු තොරතුරක් නොමැතිව අතුරුදහන් වී ඇති පුවතක් අඹන්පොළ ප්‍රදේශයෙන් වාර්තා වේ.
මෙලෙස අතුරුදහන් වී ඇත්තේ අම්බන්පොල, සේරුගොඩ ප්‍රදේශයේ පදිංචිකාරිනියක වන නිලූකා රාජපක්ෂ නමැති කාන්තාවකි. ලබාගෙන ඇති ලේඛන සහ තොරතුරුවලට අනුව ඇය විදේශ රැකියාව සඳහා සෞදි අරාබිය බලා පිටත්ව ගොස් ඇත්තේ 2012 අප්‍රේල් මස 10 වන දින ය.
කෙසේ වෙතත්, ඇය දිවයිනෙන් පිටත්ව ගිය දින සිට මේ දක්වා ගතවූ වසර 14ක කාලය තුළ ඇය සිටින ස්ථානයක් හෝ ඇයට සිදු වූ දෙයක් පිළිබඳව කිසිදු තොරතුරක් ලබා ගැනීමට ඇගේ පවුලේ නෑදෑයින්ට හැකි වී නොමැත.
මෙම අතුරුදහන් වීම සම්බන්ධයෙන් ඇගේ පවුලේ නිවැසියන් විසින් ශ්‍රී ලංකා විදේශ සේවා නියුක්ති කාර්යාංශය වෙත අවස්ථා කිහිපයකදී පැමිණිලි ඉදිරිපත් කර තිබේ. ඒ අනුව, අදාළ පැමිණිල්ල CD/183/2208 යන ලියාපදිංචි අංකය යටතේ 2022 අගෝස්තු 17 වන දින විදේශ සේවා නියුක්ති කාර්යාංශයේ ලියාපදිංචි කර ඇති බව වාර්තා වේ.
එම පැමිණිල්ලට අදාළව විදේශ සේවා නියුක්ති කාර්යාංශය විසින් 2023 සහ 2024 වර්ෂයන්හිදී ලිපි නිකුත් කර ඇති අතර, 2025 වසරේදී මේ පිළිබඳව ජනාධිපති ලේකම් කාර්යාලය ද දැනුවත් කිරීමට පියවර ගෙන තිබුණි.
එසේ වුවද, පසුගිය වසර 14 පුරා අතුරුදහන්ව සිටින නිලූකා රාජපක්ෂ පිළිබඳ මෙතෙක් කිසිදු තොරතුරක් අනාවරණය වී නොමැත.
ඇය සිටින ස්ථානයක් හෝ ඇයට සිදුවූ දෙයක් පිළිබඳව යම් තොරතුරක් සොයා ගැනීමට උපකාර කරන ලෙස ඇගේ පවුලේ ඥාතීන් බලධාරීන්ගෙන් මෙන්ම ජනතාවගෙන් ද ඉල්ලා සිටිති.
මූලාශ්‍රය
Ada Derana