දෘශ්‍යාබාධිත වූ කාන්තාවන් වෙනුවෙන් පළමු වරට සංවිධාන කරන විස්සයි20 ලෝක කුසලාන ක්‍රිකට් තරගාවලියට (Women’s T20 world Cup – Cricket for the Blind 2025) එක්වීම සඳහා ශ්‍රී ලංකා ක්‍රිකට් කණ්ඩායම අද (10) අලුයම ඉන්දියාව බලා පිටත්ව ගියේය.
ඉන්දියාව සහ ශ්‍රී ලංකාව සම සත්කාරකත්වය දරන මේ තරගාවලිය හෙට (11) ඉන්දියාවේ නවදිල්ලි නුවරදී ආරම්භ වන අතර, මේ මස 23 වැනිදා කොළඹදී නිමා වීමට නියමිතය.
සම සත්කාරක ඉන්දියාව සහ ශ්‍රී ලංකාව සමඟ මේ තරගාවලියට පාකිස්තානය, ඔස්ට්‍රේලියාව, නේපාලය සහ අමෙරිකා එක්සත් ජනපදයෙන් කණ්ඩායම් එක් වෙයි.
තරගාවලියට එක් වන ශ්‍රී ලංකා කණ්ඩායමේ නායිකාව ලෙස මිහිරානි දුලාංජලි කටයුතු කරන අතර, නිලංක කන්දේගම කණ්ඩායමේ ප්‍රධාන පුහුණුකරු ලෙස කටයුතු කරයි.
16 දෙනකුගෙන් සමන්විත ශ්‍රී ලංකා කණ්ඩායමට සම්පූර්ණයෙන්ම ඇස් නොපෙ‍ෙනන, උපැස් යුගලක් පැලඳීමෙන් යම්තාක් දුරට පෙනෙන සහ සාමාන්‍යයෙන් පෙනීම ඇති ක්‍රීඩිකාවෝ ඇතුළත්ව සිටිති.
මේ ක්‍රීඩිකාවන් ‘බී1’, ‘බී2’ සහ ‘බී3’ ලෙස කාණ්ඩ 3කට වෙන්කර ඇති අතර, ඒ අනුව ‘බී1’ කාණ්ඩයෙන් සම්පූර්ණයෙන්ම නොපෙ‍ෙනන ක්‍රීඩිකාවන් සිවුදෙනෙක්, ‘බී2’ කාණ්ඩයේදී උපැස් යුගල පැලඳ ක්‍රීඩා කළ හැකි එය ඉවත් කළ විට නොපෙනෙන ක්‍රීඩිකාවන් තිදෙනෙක් සහ ‘බී3’ කාණ්ඩයෙන් සාමාන්‍යයෙන් පෙනීම (තරමක් දුරට පෙනීම ඇති) ඇති ක්‍රීඩිකාවන් සිවුදෙනෙක් කණ්ඩායමකට එක්ව සිටිති.
ශ්‍රී ලංකා දෘෂ්‍යාබාධිත කාන්තා විස්සයි20 සංචිතය – මිහිරානි දුලාංජලි (බී3) (නායිකාව), නිපුනි චමෝද්‍යා (බී1), ස්වේතා කෞමදි (බී1), යශෝධා පියුමි (බී1), පවනි තක්ෂිලා (බී1), මොනිකා දිසානායක (බී1), සඳුනි සෞම්‍යා (බී3), අමන්ගි උබේරාම (බී3), මතිෂා සංකේතනී (බී2), සඳුනි හංසිකා (බී2), ප්‍රියදර්ෂනී පුෂ්පිකා (බී2), සන්ධ්‍යා නිලන්ති (බී3), සුදර්ෂණී ඊරියගම (බී2), උදේනි ජයමාලි (බී2), නයනා නිල්මිණි (බී2), චන්දිමා ලක්මිණි (බී3), නිලධාරීන් – නිලංක කන්දේගම (පුහුණුකරු), ටී.ඒ.එස්. සම්පත් (භෞතචිකිත්සක), සුදේශ් තරංග (ප්‍රධාන සංවිධාන නිලධාරී), ජේ.පී.ඩී.වී.ඩී. නානායක්කාර (කළමනාකාරු), එස්.සී. කුමාර (සහාය කළමනාකරු).