ලොස් ඇන්ජලීස් නගරයේ ලැව්ගිනි ඇවිලෙද්දී ගෞරවනීය ටෙනිස් ක්‍රීඩිකා පෑම් ෂ්රයිව (Pam Shriver)ගෙන් සොරා ගත් ග්‍රෑන්ඩ් ස්ලෑම් කුසලාන හමුවී තිබෙනවා.
එම කුසලාන පොලිසිය භාරයේ තිබෙන බව ඇය X සමාජ මාධ්‍යයේ පෝස්ටුවකින් ප්‍රකාශ කරනවා.
ඉතිහාසයේ බිහිවූ ශ්‍රේෂ්ඨතම යුගල ටෙනිස් ක්‍රීඩිකාවක වන ෂ්රයිව, තමාගේ ග්‍රෑන්ඩ් ස්ලෑම් කුසලාන කිහිපයක් තාවකාලිකව තබා තිබූ මෝටර් රථය සොරකම් කර ඇති බව කළින් පවසා තිබුණා.
ලොස් ඇන්ජලීස් ප්‍රදේශයේ ලැව්ගිනි පැතිර තිබීම නිසා තම නිවසින් ඉවත් වූ ෂ්රයිව සොරකම සිදුවන අවස්ථාවේ හෝටලයක නතර වී සිටියා. ඇය දැන් නැවත බ්‍රෙන්ට්වුඩ් හි ඇගේ නිවසට පැමිණ සිටිනවා.
රසවත් කතන්දරයක් බඳු ෂ්රයිවගේ ක්‍රීඩා දිවියේදී ඇය කාන්තා යුගල ග්‍රෑන්ඩ් ස්ලෑම් ශූරතා 21ක් දිනා ගත් අතර මෙයින් 20ක් ම ඇය ජයග්‍රහණය කළේ තවත් ශ්‍රේෂ්ඨ ටෙනිස් ක්‍රීඩිකාවක වන මාටිනා නව්රතිලෝවා සමග. මීට අමතරව ෂ්රයිව, මිශ්‍ර යුගල ග්‍රෑන්ඩ් ස්ලෑම් ශූරතාවක් ද හිමිකර ගැනීමට සමත් වුණා.
ෂ්රයිව ට ඇගේ නැතිවූ කුසලාන හමුවූ පුවත දැකීමෙන් පසුව නව්රතිලෝවා X වේදිකාවෙන් මෙසේ ප්‍රකාශ කර තිබුණා.
“ඒක හරිම විශිෂ්ටයි!!!පොලිසියට ජයවේවා!!!”
ඊට පිළිතුරු වශයෙන් ෂ්රයිව ඇයගේ දීර්ඝ කාලීන තරග සහකාරියට මෙසේ කීවා.
“අද මට දැනෙන්නේ අපි තවත් ප්‍රධාන තරගාවලියක් ජයග්‍රහණය කළ හැඟීමක්!”
ෂ්රයිව කාන්තා යුගල ටෙනිස් පිටියේ ඔස්ට්‍රේලියානු විවෘත ශූරතා හතක්, විම්බ්ල්ඩන් විවෘත ශූරතා පහක්, අමෙරිකානු විවෘත ශූරතා පහක් සහ ප්‍රංශ විවෘත ශූරතා හතරක් දිනා ගත්තා. මීට අමතරව ඇය ස්පාඤ්ඤයේ එමිලියෝ සැන්චස් සමග 1987දි ප්‍රංශ විවෘත මිශ්‍ර යුගල ශූරතාවක් ද ඇගේ ජයග්‍රහණ ගොන්නට එක්කර ගත්තා.
1984 වසරේදී ෂ්රයිව සහ නව්රතිලෝවා එම වසරේ සියලුම කාන්තා යුගල ප්‍රධාන තරගාවලියන් හතර ජය ගත්තේ කැලැන්ඩර් ග්‍රෑන්ඩ් ස්ලෑම් කිරුළ දිනා ගනිමින්.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
[email protected]