දිරිය දියණියකට ගරු කරන්න අසුනින් නැගිට්ට රුහුණේ කුලපති හිමි

    0
    23

    පසුගිය 18 සහ 19 දිනවල පැවති රුහුණු විශ්වවිද්‍යාලයේ 33 වැනි උපාධි ප්‍රදානෝත්සවයේදී සිදු වූ මේ සංවේදී සිදුවීම, සමස්ත සරසවි ප්‍රජාවගේම නෙතට කඳුළක් එක් කළේය.

    වසර ගණනාවක් පුරා විඳි දුක් කම්කටොලු ජයගෙන උපාධි සිහිනය සැබෑ කරගත් දහස් සංඛ්‍යාත තරුණ තරුණියන් අතර, ඇය සුවිශේෂී චරිතයක් වූවාය.

    ශාරීරික අපහසුතා මධ්‍යයේ වුවද අසීමිත ආත්මශක්තියකින් යුතුව ඇය විද්වත් සභාව වෙත පියමැන්නාය.

    ඇය කුලපති අසුන අබියසට පැමිණි සැණින්, රුහුණු සරසවියේ කුලපති අග්ගමහා පණ්ඩිත ආචාර්ය අකුරැටියේ නන්ද නාහිමියෝ සිය අසුනින් නැගී සිට උපාධි සහතිකය පිරිනැමූහ.

    භික්ෂූන් වහන්සේ නමක් සාමාන්‍යයෙන් අසුනින් නැගිට ගෞරව දක්වන්නේ උපසම්පදාවෙන් වැඩිමහල් භික්ෂුවකට හෝ ජාතික ගීය වැනි අවස්ථාවකදී පමණි.

    පුද්ගල ගෞරවයක් වෙනුවෙන් භික්ෂුවක් හුනස්නෙන් නැගී සිටීම මෙරට සරසවි ඉතිහාසයේ අතිශය විරල මෙන්ම ඓතිහාසික මොහොතක් බවට පත් විය.

    තමන් ගත් එම තීරණය පිළිබඳව අකුරැටියේ නන්ද නාහිමියන් පසුව සඳහන් කළේ ඇගේ අසීමිත ධෛර්යය තමන් තුළ දැඩි ගෞරවයක් ඇති කළ බවයි.

    “ඇයට උදව්වට දෙදෙනෙක් සිටියා. නමුත් ‘මම තනියමයි උපාධිය ගන්න යන්නේ, ඔයාලා එන්න එපා’ කියලා ඇය ඔවුන්ව නතර කර තිබුණා.”

    ඇයට තනිවම ලිවීමට මෙන්ම පැහැදිලිව කතා කිරීමට ද දැඩි අපහසුතා පැවති බව නාහිමියෝ සිහිපත් කළහ.

    එබැවින් ඇය වාචිකව ලබා දුන් පිළිතුරු වෙනත් අයෙකු ලවා ප්‍රශ්න පත්‍රවල සටහන් කර ගැනීමට (අනුලේඛක සහාය ලබා ගැනීමට) රුහුණු විශ්වවිද්‍යාලය විශේෂ අවසරයක් ලබා දී තිබේ.

    මුළු විශ්වවිද්‍යාලයම එකම පවුලක් මෙන් ඇයට කරුණාව දක්වමින් ලබා දුන් මෙම සහයෝගය මනුෂ්‍යත්වය පිළිබඳ ඉහළම ආදර්ශයක් බව කුලපති හිමියෝ පැවසූහ.

    මෙලෙස දිරිය දියණියක අබියස නිහතමානී වූ අකුරැටියේ නන්ද නාහිමියෝ මෙරට බිහි වූ විශිෂ්ටතම ශාස්ත්‍රවන්තයෙකි.

    ගාල්ල බද්දේගම අකුරැටිය ග්‍රාමයේ උපන් උන්වහන්සේ, මාලිගාකන්ද විද්‍යෝදය පිරිවෙනේ අධ්‍යක්ෂ ධුරය මෙන්ම මහාවංස සම්පාදක මණ්ඩලයේ සභාපති ධුරය ද හොබවති.

    කැලණිය විශ්වවිද්‍යාලයෙන් මූලික උපාධියත්, තායිලන්තයේ චූලාලොංකෝන් විශ්වවිද්‍යාලයෙන් ආචාර්ය උපාධියත් ලබා ඇති උන්වහන්සේ එංගලන්තයේ මැන්චෙස්ටර් සරසවියෙන් ද ශාස්ත්‍රීය ශික්ෂණය ලබා ඇත.

    සිංහල ශබ්දකෝෂයේ ප්‍රධාන කර්තෘවරයා ලෙසත්, ශ්‍රී ලංකා බෞද්ධ හා පාලි විශ්වවිද්‍යාලයේ මහෝපාධ්‍යායවරයා ලෙසත් උන්වහන්සේ කළ සේවය අතිමහත්ය.

    පෙර-අපර දෙදිග දැනුමෙන් පෝෂණය වූ එවන් මහා පඬිවරයෙකු දිරිය දියණියකගේ ආත්මශක්තිය හමුවේ හුනස්නෙන් නැගිට ගෞරව කිරීම, සමස්ත සමාජයටම මනුෂ්‍යත්වයේ පාඩමක් කියා දුන්නේය.

    වැඩිදුර තොරතුරු ඇතුළත් මූලාශ්‍ර සබැඳිය

    මුල් පුවත් වාර්තාව:

    LEAVE A REPLY

    Please enter your comment!
    Please enter your name here