අනාගතය උදෙසා ප්‍රබල කාන්තා නායකත්වයක් ගොඩනැගීමේදී, ගෝලීය වශයෙන් පමණක් නොව ශ්‍රී ලංකාව තුළ ද කාන්තාවන්ගේ දේශපාලන සහ නායකත්ව සහභාගීත්වය කෙරෙහි ධනාත්මක ආකල්පමය වෙනසක් සිදුවෙමින් පැවතීම ඉතා පැහැදිලිව දැකිය හැකි සාධනීය ප්‍රවණතාවක් බවට පාර්ලිමේන්තුවේ නියෝජ්‍ය කාරක සභාපතිනී හේමාලි වීරසේකර ප්‍රකාශ කළා.
ජනාධිපති ලේකම් කාර්යාලයේ පැරණි පාර්ලිමේන්තු සභාගර්භයේදී මාරවිල ශුද්ධ වූ පවුලේ බාලිකා මධ්‍ය මහා විද්‍යාලයේ ශිෂ්‍ය පාර්ලිමේන්තුව අමතමින් ඇය මෙම අදහස් පළ කර සිටියාය.
හැකියාවන්, දැනුම සහ අධ්‍යාපනය යන ක්ෂේත්‍රයන් හි කාන්තාවන් ලබා ඇති පූර්ණ ශක්තිමත්භාවය හේතුවෙන් ඉදිරියේදී දේශපාලනයට සහ රාජ්‍ය පරිපාලනයට සක්‍රියව දායක වීමේ යහපත් ප්‍රවණතාවක් නිර්මාණය වී ඇති බව පෙන්වා දුන් ඇය, තවද එම ඉලක්ක සපුරා ගැනීම සඳහා දැඩි කැපවීමක් ද අවශ්‍ය වන බව ද අවධාරණය කළා ය.
මාරවිල ශුද්ධ වූ පවුලේ බාලිකා මහා විද්‍යාලයේ ශිෂ්‍ය පාර්ලිමේන්තුවේ කථානායකවරිය තේරී පත්වීම ද මෙහිදී සිදු වූ අතර, තේරී පත් වූ ශිෂ්‍ය අමාත්‍යවරියන් විසින් තමන්ගේ අමාත්‍යාංශ යටතේ ක්‍රියාත්මක කිරීමට යෝජිත වැඩසටහන් පිළිබඳව අදහස් සහ යෝජනා ඉදිරිපත් කරන ලදී.
මෙම වැඩසටහන ජනාධිපති ලේකම් කාර්යාලය සහ ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව එක්ව සංවිධානය කර තිබුණි.
සටහන | කල්පනී ෂමල්කා
වැඩිදුර විස්තර සඳහා
Sri Lanka Parliament Website