නවසීලන්ත ලින්කන් විශ්වවිද්යාලය සමඟ දෙවැනි නෙට්බෝල් තරගයේ මැද භාගයේදී ලකුණු 6කින් නවසීලන්තය පසුපසට ඇද දැමූ ශ්රී ලංකා ක්රීඩිකාවෝ අවසන් අර්ධයේදී ඇති වූ තාක්ෂණික දෝෂ හේතුවෙන් පසුබැසීමේ වාසිය මත නවසීලන්ත පිල ලකුණු 72 – 65ක ජයක් වාර්තා කළේය.
කෙසේ වුවද ආසියානු නෙට්බෝල් ශූරතාවලියට සූදානම් වන ශ්රී ලංකා නෙට්බෝල් කණ්ඩායමට පුහුණුවක් ලබාදීමේ අරමුණින් නවසීලන්ත විශ්වවිද්යාල නෙට්බෝල් කණ්ඩායම සමඟ මේ තරගාවලිය හොඳම අත්දැකීමක් බවට පත්ව තිබීම කැපී පෙනිණි.
තරග 6කින් සමන්විත මේ නෙට්බෝල් තරගාවලියේ පැවති තරග දෙකම නවසීලන්ත ලින්කන් විශ්වවිද්යාලය ජයගත්තද, වසර දෙකකට පසු විදෙස් රටක් සමඟ තරගයකට එක්ව සිටින ශ්රී ලංකා ක්රීඩිකාවෝ සටන්කාමී ක්රීඩා විලාශයක් පෙන්නුම් කිරීම විශේෂත්වයකි.
ගාල්ල දඩල්ල ක්රීඩා සංකීර්ණයේ ඊයේ පැවති දෙවැනි තරගයේ පළමු කාර්තුවේදී ලකුණු 17 – 16ක් ලෙස ඉදිරියෙන් සිටි නවසීලන්ත පිලට විශාල තර්ජනයක් දෙමින් ශ්රී ලංකා නෙට්බෝල් ක්රීඩිකාවෝ දෙවැනි කාර්තුවේදී 20 – 13ක ලකුණු පරතරයකින් ඉදිරියට පැමිණියහ. තෙවැනි කාර්තුවේදී ලකුණු 19 – 10ක් ලෙස නවසීලන්තය වේගවත් ක්රීඩා විලාශයකට පිවිසි අතර, සිව්වැනි කාර්තුවේ ලකුණු තත්ත්වය වූයේ ලකුණු 23 – 9ක් ලෙස නවසීලන්ත විශ්වවිද්යාල පිල තව තවත් ඉදිරියට යෑමෙනි.
පළමු අර්ධය නිමාවෙද්දී නවසීලන්ත පිල ලකුණු 30ක් වෙද්දී ශ්රී ලංකා පිල ලකුණු 36ක් ලෙස ඉදිරියෙන් සිටි හෙයින් ජයග්රහණය පිළිබඳ විශාල බලාපොරොත්තුවක් ඇති වුණද, සිදුකළ වෙනස්කම් කිහිපයක් පලදායී නොවිණි. එමෙන්ම නවසීලන්ත ක්රීඩිකාවෝ සෙන්ටර් ස්ථානයේ සිට ගෝල් ෂූටර් ස්ථානය දක්වා පන්දු කිහිපයක්ම යොමු කිරීම ශ්රී ලංකා පිලට පාලනය කරගත නොහැකි විය.
පළමු කාර්තු දෙකේදී මුල් කණ්ඩායම ලෙස ගෝල් ෂූටර් තිසලා අල්ගම (නායිකා), වින්ග් ඇටෑක් රශ්මි දිව්යාංජලී (උප නායිකා), ගෝල් ඇටෑක් දුලංගි වන්නිතිලක, ගෝල් ඩිෆෙන්ස් මල්මී හෙට්ටිආරච්චි, සෙන්ටර් ගයාන්ජලී අමරවංශ, ගෝල් කීපර් ගයනි දිසානායක හා වින්ග් ඩිෆෙන්ස් චලනි නීෂා ක්රීඩා කළ අතර, තෙවැනි කාර්තුවේදී සෙන්ටර් තිළිණි වත්තේගෙදර, ගෝල් ඇටෑක් තුමල්කා ඒකනායක, ගෝල් කීපර් අංජලිකා තිලකරත්න හා වින්ග් ඩිෆෙන්ස් තිමී වසන්තප්රිය එක් කිරීමට පුහුණුකාරිනී සොමිතා ද අල්විස් මහත්මිය තීරණය කළාය.
එහි අසාර්ථකත්වය දුටු පුහුණුකාරිනිය සිව්වැනි කාර්තුවේදී ගෝල් ෂූටර් ස්ථානයට භාෂී උඩගෙදර එක් කළ අතර, ගෝල් ඩිෆෙන්ස් ස්ථානයට තිමී වසන්තප්රිය ආදේශ කළාය. එහෙත් නවසීලන්ත විශ්වවිද්යාල පිලේ වේගය අඩාළ කිරීමට එම උපක්රම සාර්ථක නොවිණි.
තරග 6කින් සමන්විත ශ්රී ලංකා – ලින්කන් විශ්වවිද්යාල නෙට්බෝල් කණ්ඩායම් අතර මීලඟ තරගය අද පස්වරු 5ට මහනුවර දිගන ක්රීඩාංගණයේදී පැවැත්වේ.
ප්රින්ස් ගුණසේකර ගාල්ල දඩල්ල ක්රීඩාංගණයේ සිට…