අධ්‍යයන පොදු සහතික පත්‍ර උසස් පෙළ උත්තර පත්‍ර අගැයීම් කරනු ලබන ගුරුවරියන් සාරියක් හෝ ඔසරියකින් සැරසී නොපැමිණීම හේතුවෙන් කොළඹට නුදුරු ප්‍රධාන පාසලකට ඇතුළු වීම තහනම් කර තිබේ.
උසස් පෙළ සංයුක්ත ගණිතය උත්තර පත්‍ර අගැයීමට පෙරේදා (ජනවාරි 16) වැනි දා පන්නිපිටිය ධර්මපාල විදුහලේ පිහිටා ඇති මධ්‍යස්ථානයට ගිය ගුරුවරියන් මෙලෙස එම පාසලෙන් හරවා යවා ඇති බව ලංකා ගුරු සංගමයේ ප්‍රධාන ලේකම් ජෝසෆ් ස්ටාලින් බීබීසී සිංහල සේවයට පැවසීය.
අදාළ සිදුවීම වූ අවස්ථාවේදී එම ස්ථානයට පොලිසිය කැඳවා ඇති අතර මෙම සිදුවීම තමන්ට අදාළ නැති බව පොලිසිය පවසා තිබූ බව ද ඔහු සඳහන් කළේ ය.
‘ගුරුවරියන්ට නිල ඇඳුමක් නෑ’
“ගුරුවරියන්ට කොහෙවත් නිල ඇඳුමක් දීලා නැහැ සාරි අඳින්න කියලා. කැමති අය සාරි අඳිනවා වෙනත් සුදුසු ඇඳුමක් අඳින්න කියලා පහුගිය කාලේ ඉඳන් ම තිබුණේ. නමුත් අගැයීම් මධ්‍යස්ථානවලට යනකොට ඒවා වෙනත් රාජකාරි, ඉගැන්වීමේ කාර්යයක් නෙමෙයි. මේ මධ්‍යස්ථානයේ, මේ ශාලාවේ එක ෆෑන් එකයි තිබුණේ. එතන ඔක්කොට ම ඉන්න බෑ, සංයුක්ත ගණිතය කියන්නේ සංකීර්ණ ප්‍රශ්න පත්‍රයක් ඒක නිවැරදි මානසිකත්වයෙන් කරන්න ඕනේ. දැන් උත්තර පත්‍ර අගැයීම් කරන්න දෙන දීමනාවත් ප්‍රමණාවත් නැහැ ගුරුවරුන්ට, නමුත් ළමයි වෙනුවෙන් මේ කටයුත්ත කරන්නේ. එහෙම තියෙද්දි මේ ආකාරයෙන් පීඩාවට පත් කිරීම වැරදියි.”
වෙළෙඳ දැන්වීමක්
ගුරුවරියන්ට සාරි ඇඳීම අනිවාර්ය කර නොමැති පසුබිමක පන්නිපිටිය ධර්මපාල විදුහලේ විදුහල්පතිවරයා විභාග මධ්‍යස්ථානයේ ගුරුවරුන් හරවා යැවීම ගැන පරීක්ෂණයක් පැවැත්විය යුතු බව ලංකා ගුරු සංගමයේ ලේකම්වරයා අවධාරණය කළේ ය.
කිංස්වුඩ් විදුහලෙත් මෙවැනි ම සිදුවීමක්
පසුගිය සතිඅන්ත නිවාඩු දිනවලදී මහනුවර කිංස්වුඩ් විදුහලේ පිහිටා ඇති උත්තර පත්‍ර අගැයීම් මධ්‍යස්ථානයේ ගුරුවරියන් ද මෙවැනි ම සිදුවීමකට මුහුණ දී ඇතැයි ජෝසෆ් ස්ටාලීන් සඳහන් කළේය.
“මහනුවර කිංස්වුඩ් එකෙත් ඔහොම වුණා. ඒ සතිඅන්තයේ සාරි ඇඳන් ගියේ නෑ කියලා. සතිඅන්තයෙත් සාරි පටලවන් යන්න ඕනේ කියලා නේ කියන්නේ.”
“කිංස්වුඩ් එකේ ගේට්ටුවෙන් ඇතුළට අරන් නැහැ. සාරි ඇඳන් එන්න කියලා.”
ගුරුවරුන්ගේ ඇඳුම කෙසේ විය යුතු ද?
අධ්‍යාපන අමාත්‍යංශයෙන් නිකුත් කරන ලද 2012/37 අංක දරන ‘ගුරුවරුන්ගේ සදාචාරාත්මක හැසිරීම පිළිබඳ ආචාරධර්ම පද්ධතිය හා පොදු නීති මාලාව’ නම් චක්‍රලේඛයෙහි ගුරුවරුන්ගේ ඇඳුම් සම්බන්ධයෙන් මෙසේ සඳහන් කර ඇත;
“සැමවිට ම විනීත හා සංවරභාවය රැකෙන පරිදි සංස්කෘතියට අනුකූල වූ, පිරිසිදු, චාම්, මනා පිළිවෙලට සැකසූ ඇඳුමින් සැරසී සිටීම.”
“සාමාන්‍යයෙන් උත්තර පත්‍ර අගැයීම් කටයුතු පහුගිය කාලෙම කළේ ඉස්කෝලේ නිවාඩු දීලා. උත්තර පත්‍ර අගැයීම් මධ්‍යස්ථානය තියෙන ඉස්කෝල නිවාඩු දෙනවා. ඉස්කෝලෙත් පවත්ගෙන මේ කටයුතු කරන නිසා තමයි මේ ඔක්කොම ගැටලු එන්නේ. අනිත් එක ගුරුවරියන්ට නිල ඇඳුමක් නෑ. සම්ප්‍රාදායිකව තමයි මේක එන්නේ.”
සාරි අඳින ලෙස බලපෑම් කරන බවට චෝදනා
මේ වනවිට විභාග දෙපාර්තුමේන්තුව විසින් පන්නිපිටිය ධර්මපාල විදුහලේ පිහිටුවා ඇති මධ්‍යස්ථානයේ අගැයීම් කටයුතු තාවකාලිකව නැවතීමට පියවර ගනු ලැබ ඇත.
විභාග දෙපාර්තුමේන්තුව මෙලෙස අගැයීම් කටයුතු නවතා දැමීම හරහා ඔවුන්ගේ “කුහකත්වය” සහ “දීන මානසිකත්වය” පෙන්නුම් කරන බවට ද වෘත්තීය සමිති නායකයා චෝදනා කළේ ය.
විභාග කෙමසාරිස් ජනරාල්වරයාගෙන් මෙන් ම අධ්‍යාපන ලේකම්වරයාගෙන් මෙම ගැටලුව සඳහා දිනයක් ඇතුළත විසඳුමක් ලබා දෙන ලෙස ඉල්ලා සිටි බව ජෝසෆ් ස්ටාලින් බීබීසි සිංහල වෙත පැවසීය.
“අද දවස ඇතුළත මේ ගැන තීන්දුවක් ගන්න ගමන් වටින් යම් යම් විදිහට ගුරුවරුන්ට බලපෑම් කරවනවා සාරි ඇඳන් එන්න කියලා. මොකට ද මෙහෙම කරන්නේ, මොකද්ද බලාපොරොත්තු වෙන සාදාචාරය මේකෙන්.”
අද සිට අගැයීම් කටයුතු විභාග දෙපාර්තුමේන්තුවේ
අදාළ සිදුවීම සම්බන්ධයෙන් විභාග කොමසාරිස් ජනරාල් අමිත් ජයසුන්දරගෙන් බීබීසී සිංහල විමසීමක් කළේ ය.
එහිදී ඔහු සඳහන් කළේ අදාළ කණ්ඩායම් දෙක විභාග දෙපාර්තුමේන්තුවේ ස්ථාපනය කර ඇති අගැයීම් මධ්‍යස්ථානයට කැඳවා ජනවාරි 18 සිට යළි උත්තර පත්‍ර අගැයීම් කටයුතු ආරම්භ කරන බව ය.
“ඒ පැනල්ස් දෙක හෙට ඉඳලා පටන් ගන්නවා මම විභාග දෙපාර්තුමේන්තුවේ. එතනින් ඒ ප්‍රශ්නය ඉවරයි. මම හිතනවා මාධ්‍යයෙන් මේ ප්‍රශ්නය වැඩිය ම හයිලයිට් වෙන්න ඕනේ නැහැ කියලා.”
මෙම සිදුවීමට අදාළ විදුහලේ විදුහල්පතිනිය සම්බන්ධව ක්‍රියාමාර්ගයක් ගන්නේ දැයි අප විභාග කොමසාරිස් ජනරාල්වරයාගේ විමසනු ලැබීය.
“විදුහල්පතිනිය සම්බන්ධයෙන් ක්‍රියාමාර්ගයක් ගන්න මට පුළුවන් කමකුත් නැහැ. මට අවශ්‍යතාවයකුත් නැහැ නේ. විදුහල්පතිනිය පාසල් පාලනය කරගෙන යන කෙනෙක් නේ. මම දකින්නේ නැහැ එයා කරපු වැරැද්දක් සම්බන්ධයෙන්,” යැයි විභාග කොමසාරිස් ජනරාල් අමිත් ජයසුන්දර වැඩිදුරටත් පැවසීය.
| BBC සිංහල සේවය