උදේ ගෙදරින් පිටවෙන වෙලාවේ අහස හොඳටම පැහැදිලියි. ඒත් වැඩට ගිහින් සවස එළියට එනකොට මහා වැස්සක්. කුඩයක් ළඟ තිබුණත්, තෙත බරිත වෙච්ච ඇඳුමක් එක්ක මුළු දවසම අපහසුවෙන් ගත කරන්න සිදුවුණොත් ඒ දවසේ ප්රබෝධය සම්පූර්ණයෙන්ම නැති වී යනවා. ලංකාවේ වෙනස් වන කාලගුණය එක්ක ඇඳුම් තෝරාගන්නා විට විලාසිතාවට වඩා තවත් වැදගත් දෙයක් ගැන හිතන්න වෙනවා. ඒ තමයි “අද කාලගුණයට මේ ඇඳුම ඇත්තටම සුවපහසුද?” කියන ප්රශ්නය.
ලංකාවේ උණුසුම, වැඩි ආර්ද්රතාව සහ හදිසියෙන් වැටෙන වැසි නිසා එකම විලාසිතාවක ඇඳුම් රටාවක් හැම දවසකටම ගැළපෙන්නේ නැහැ. ඒ නිසා වැසි සහිත දවසකට ඇඳුමක් තෝරාගැනීමේදී ලස්සන පෙනුම වගේම ශරීරයට දැනෙන පහසුව, වාතය ගමන් කිරීමට ඇති ඉඩ සහ ඇඳුම තෙත වුණොත් එය කොතරම් ඉක්මනින් වියළෙයිද කියන ප්රායෝගික කරුණු ගැනත් සැලකිලිමත් වීම අත්යවශ්යයි.
නිවැරදි රෙදි වර්ගයක් තෝරාගන්න
ලංකාවේ උණුසුම් හා තෙතමනය සහිත කාලගුණයට ඇඳුමක් තෝරාගැනීමේදී රෙදි වර්ගය ගැන විශේෂයෙන් අවධානය යොමු කළ යුතුයි. ලිනන් සහ කපු වැනි ස්වභාවික රෙදි වාතය පහසුවෙන් ගමන් කිරීමට ඉඩ සලසන නිසා උණුසුම් දවසක ශරීරයට මහත් සුවපහසුවක් ගෙන දෙනවා.
විශේෂයෙන්ම ලිහිල් ලිනන් කමිසයක්, සැහැල්ලු කපු ගවුමක් හෝ පුළුල් කකුල් සහිත කලිසමක් වැනි ඇඳුම් ශරීරය වටා වාතය සංසරණය වීමට ඉඩ සලසන නිසා දවස පුරා ප්රබෝධමත්ව ඉන්න උදව් වෙනවා. වැස්සත් එක්ක උණුසුමත් එකතු වන දවසක ඇඳුම ශරීරයට තදින් ඇලී තිබෙනවා නම් තෙතමනය නිසා ඇති වන අපහසුතාව තවත් වැඩි වෙන්න පුළුවන්. ඒ නිසා “ඇඟටම හිරවෙන” විලාසිතාවකට වඩා ටිකක් නිදහස් හැඩයක් තිබෙන ඇඳුමක් තෝරාගැනීම ප්රායෝගිකයි.
වැස්ස නිසා අඳුරු පාටවල්ද අඳින්නේ?
වැසි සහිත දවසකට ඇඳුම් තෝරාගන්නකොට බොහෝ දෙනෙක් තද පැහැයන් වෙත නැඹුරු වෙන්නේ මඩ හෝ වැසි ජලයේ පැල්ලම් පෙනෙන්නේ නැහැ කියන සිතුවිල්ලෙන් වෙන්න පුළුවන්. නමුත් ලංකාවේ පවතින උණුසුම් කාලගුණයත් එක්ක නම් සුදු, පැස්ටල් සහ වෙනත් සැහැල්ලු වර්ණවල ඇඳුම් වඩාත් සුවපහසු තේරීමක් විය හැකියි.
සැහැල්ලු වර්ණයක දිගු ගවුමක්, නිදහස් සායක් හෝ සරල කමිසයක් වුණත් නිවැරදිව ගැළපීම තුළ වැසි දවසකට වුණත් ඉතා අලංකාර සහ ආකර්ෂණීය පෙනුමක් ලබාගන්න පුළුවන්. ඇඳුම කියන්නේ කාලගුණයෙන් බේරෙන්න පමණක් පාවිච්චි කරන දෙයක් නෙවෙයිනේ, සුවපහසුව තෝරාගැනීම යනු විලාසිතාව අතහැරීමම නොවේ.
කාලගුණයට ගැළපෙන බඩු බාහිරාදිය ළඟ තබා ගන්න
හදිසි වැස්සකට හෝ අව්වට මුහුණ දෙන්න වෙන්නේ කවදාද කියලා කල්තියා කියන්න බැහැ. ඒ නිසා කුඩය වගේම දවසේ ඇඳුමට ගැළපෙන වැසි ආරක්ෂක ළඟ තබාගැනීම නුවණට හුරුයි.
සැහැල්ලු ස්කාෆ් එකක් හෝ පුළුල් දාරයක් සහිත තොප්පියක් වගේ දේවල් හිරු රශ්මියෙන් ආරක්ෂාව ලබාදෙනවා වගේම, සමස්ත ඇඳුම් පෙනුමට අමතර හැඩයක් එකතු කරනවා. ඒ වගේම, වැස්සත් සමඟම තද අව්වක් තිබෙන ලංකාවේ කාලගුණය ගැන සිතමින් සමට ආරක්ෂාව සපයන හිරු ආරක්ෂක ආලේපනයක් භාවිත කිරීමටත් අමතක කරන්න එපා.
වැසි දවසකට නුසුදුසු ඇඳුම් මොනවාද?
ලංකාවේ පවතින තෙතමනය සහිත කාලගුණයට බර රෙදිවලින් කළ ඇඳුම් හැමවිටම පහසු වන්නේ නැහැ. ලොම් සහිත රෙදි, ඇතැම් පොලියෙස්ටර් වර්ග සහ ඩෙනිම් වැනි බර රෙදි තාපය වැඩිපුර රඳවාගැනීමට උත්සාහ කරන නිසා උණුසුම් හා තෙතමනය වැඩි දවසක සිරුරට මහත් අපහසුතාවක් ගෙන දෙනවා.
විශේෂයෙන්ම වැස්සට ඩෙනිම් කලිසමක් තෙමුණොත් එහි බර තවත් වැඩි වන අතර, එය වියළී යන්නට වැඩි කාලයක් ගත වෙනවා. ඒ නිසා දිගු වෙලාවක් එළිමහනේ ගත කරන්න සිදුවන දවසකට ඇඳුම් තෝරාගැනීමේදී මේ ප්රායෝගික ගැටලු ගැන සැලකිලිමත් වීම ඉතා වැදගත්.
ඇත්තටම ලංකාවේ කාලගුණය එක්ක විලාසිතා තෝරාගැනීමේදී “මෙන්න මේකමයි අඳින්න ඕනෙ” කියලා දැඩි නීති පැනවීම අපහසුයි. උදේ පවතින කාලගුණය සවස වන විට සම්පූර්ණයෙන්ම වෙනස් වෙන්න පුළුවන්. ඒ නිසා ඇඳුමක් අඳින්න පෙර එදින කාලගුණ තත්ත්වය, ඔබ එළිමහනේ ගත කරන කාලය සහ යන ස්ථානය ගැන මදක් සිතා බලන්න.
- සැහැල්ලු සහ වාතය ගමන් කරන රෙදි වර්ග
- සිරුරට සුවපහසු නිදහස් හැඩැති ඇඳුම්
- දෙනය ප්රබෝධමත් කරන සැහැල්ලු වර්ණ
- අවශ්ය මොහොතක භාවිත කළ හැකි කුඩයක් සහ උපාංග
මේ පුංචි දේවල් ටික නිවැරදිව එකතු කරගත්තොත්, වැසි දවසක් කියන්නේ ඔබේ විලාසිතාවන් පැත්තකට දමන්න සිදුවන දවසක් නෙවෙයි. කාලගුණයට ගැළපෙන පරිදි ස්මාර්ට් ලෙස සැරසී, ඔබේ සුවපහසුව මෙන්ම අනන්ය විලාසිතාවත් එකසේ රඳවාගන්න ඔබටත් පහසුවෙන්ම පුළුවන්!