ජාතික ආර්ථික සංවර්ධනයට කාන්තාවන්ගේ පූර්ණ සහභාගීත්වය සීමා කරන බාධක බිඳ දැමීමට කැපවී සිටින බව පුන පුනා ප්‍රකාශ කරන රජය, නැවත වරක් “පුරුෂයන් ගෙන් පමණක් සමන්විත උපදේශන කමිටුවක්” සංචාරක සංවර්ධනය සහ ප්‍රවර්ධනය වෙනුවෙන් පත් කිරීමට කටයුතු කර තිබේ.
2005 අංක 38 දරන සංචාරක පනතේ 32 (1) වගන්තිය යටතේ පිරිමි 13 දෙනකුගෙන් සමන්විත මෙම සංචාරක උපදේශක කමිටුව පත් කර ඇත්තේ ගෝලීය සංචාරක ගමනාන්තයක් ලෙස ශ්‍රී ලංකාවේ තත්ත්වය ඉහළ නංවාලීම සඳහා සහයෝගී ප්‍රයත්නයක් වෙනුවෙන් බවයි විදේශ කටයුතු, විදේශ රැකියා සහ සංචාරක අමාත්‍ය අමාත්‍ය විජිත හේරත් පවසන්නේ.
එම කමිටුව John Keells Holdings PLC හි ජ්‍යෙෂ්ඨ උප සභාපති දිලීප් මුඩදෙණිය, ශ්‍රී ලංකා සංචාරක සංවර්ධන අධිකාරිය සහ ශ්‍රී ලංකා සංචාරක ප්‍රවර්ධන කාර්යාංශයේ සභාපති බුද්ධික හේවාවසම්, ශ්‍රී ලංකා සංචාරක හා හෝටල් කළමනාකරණ ආයතනය සභාපති ධීර හෙට්ටිආරච්චි, Galle Face Hotels සමූහ ව්‍යාපාරයේ උප සභාපති නිහාල් මුහන්දිරම්, විදේශ රැකියා සහ සංචාරක ජ්‍යෙෂ්ඨ අධ්‍යක්ෂ ජනරාල් – ආර්ථික කටයුතු දර්ශන එම්. පෙරේරා, සංචාරක හා කර්මාන්ත මණ්ඩලයේ ජාතික සම්බන්ධීකාරක ඩොනල්ඩ් රාජපක්ෂ, කොළඹ විශ්ව විද්‍යාලයේ තිරසාර සංචාරක ඒකකය (STU), කලා පීඨය, ආර්ථික විද්‍යා අංශය මහාචාර්ය ඩී. ඒ. සී. සුරංග සිල්වා, Tiesh ලිමිටඩ් කළමනාකාර අධ්‍යක්ෂ සහ නිර්මාතෘ ලසන්ත ද ෆොන්සේකා, Connaissance de Ceylon සහ Thema Collection සභාපති චන්ද්‍රා වික්‍රමසිංහ, Craft Tunnel නිර්මාණකරු, හිමිකරු අජිත් පෙරේරා, Nihonbashi, Ministry of Crabs සූපවේදී, නිර්මාණකරු සහ හිමිකරු දර්ශන මුනිදාස, ශ්‍රී ලංකා සබරගමුව විශ්වවිද්‍යාලයේ ජ්‍යෙෂ්ඨ කථිකාචාර්ය – සංචාරක කළමනාකරණ දෙපාර්තමේන්තුව ආචාර්ය සරත් මුණසිංහ සහ නුවරඑළිය හෝටල් සමාගම (PLC) නියෝජ්‍ය සභාපති/කළමනාකාර අධ්‍යක්ෂ ජෙරාඩ් ජෝර්ජ් යන සාමාජිකයන් ගෙන් සමන්විත ය.
කාන්තා නියෝජනය වචනවලට සීමා වෙයි
කාන්තාවන්ගේ සම නියෝජනය සහතික කිරීම ප්‍රධාන මැතිවරණ පොරොන්දුවලින් එකක් බවත්, මෙරට පුරවැසියන්ගෙන් සැලකිය යුතු කොටසක් නායකත්වයෙන් සහ තීරණ ගැනීමෙන් බැහැර කෙරෙන්නේ නම් අප බලාපොරොත්තු වන “ප්‍රජාතන්ත්‍රවාදය” අසම්පූර්ණ එකක් බවත් ජාත්‍යන්තර කාන්තා දින පණිවිඩයක් නිකුත් කරමින් අගමැති හරිනි අමරසූරිය අවධාරණය කළ අතර වචනවලින් පමණක් නොව, ස්ත්‍රී පුරුෂ භාවයට, සංවේදී ප්‍රතිපත්ති, අයවැය සහ සියලුම කාන්තාවන්ගේ සහ ආන්තික ප්‍රජාවන්ගේ ජීවමාන අත්දැකීම් හරහා පරිවර්තනීය ක්‍රියාමාර්ග සඳහා කැපවී ක්‍රියාකරන බවටත් ඇය සහතික වූවා ය.
“ගොඩනැගීමට කාන්තා හඬ, නායකත්වය සහ නියෝජනය අත්‍යවශ්‍ය වේ.
ස්ත්‍රීවාදී ව්‍යාපාර දිගු කලක් තිස්සේ අපට පෙන්වා දී ඇත්තේ වෙනසක් කළ හැකි බවය. නමුත්, ඒ අපි පවතින තත්ත්වයට අභියෝග කර සමස්ත ක්‍රමයෙන් පරිවර්තනයක් අපේක්ෂා කරන්නේ නම් පමණි. ශ්‍රී ලංකාවේ අග්‍රාමාත්‍යවරිය ලෙස, කාන්තාවන්ගේ සහ ගැහැනු ළමයින්ගේ අයිතිවාසිකම් කේන්ද්‍රකරගත් ප්‍රතිපත්තිමය ක්‍රියාවලීන් ඉදිරියට ගෙනයෑම සඳහා වන අපගේ කැපවීම යළි තහවුරු කරන්නෙමි.
මෙම ජාත්‍යන්තර කාන්තා දිනයේදී වචනවලින් පමණක් නොව, ස්ත්‍රී පුරුෂ භාවයට, සංවේදී ප්‍රතිපත්ති, අයවැය සහ සියලුම කාන්තාවන්ගේ සහ ආන්තික ප්‍රජාවන්ගේ ජීවමාන අත්දැකීම් හරහා පරිවර්තනීය ක්‍රියාමාර්ග සඳහා අප කැපවී ක්‍රියාකරන බවට සහතික වන්නෙමු. කාන්තාවන් දියුණු වන්නේ නම් සමස්ත ප්‍රජාවම දියුණු වේ. කාන්තාවන් නායකත්වය දරන කල්හි සමස්ත ප්‍රජාවම පරිවර්ථනයකට ලක්වේ.”
එසේම, ජාතික සංවර්ධනය සඳහා කාන්තාවන් සිදුකරන වැදගත් කාර්යභාරය හඳුනා ගනිමින් ආර්ථිකය තුළ කාන්තාවන්ගේ පූර්ණ සහභාගීත්වය සීමා කරනු ලබන බාධක බිඳ දැමීමට රජය කැපවී සිටින බව ද ඉකුත් 14 වැනිදා She Trades Sri Lanka Hub දියත් කිරීමේ වැඩසටහනට එක්වෙමින් අගමැතිනිය පැවසුවා ය.
කෙසේ වෙතත්, ජාතික සංචාරක ප්‍රතිපත්තියේ දක්වා ඇති අරමුණු සාක්ෂාත් කර ගැනීම සඳහා විවිධ පසුබිම් සහිත විවිධ කර්මාන්තවල නිරත වෘත්තිකයන් සහ පාර්ශවකරුවන් ගේ එකතුවක් ලෙස අර්ථ දක්වමින් මාර්තු 18 වැනිදා පිහිටවූ උක්ත සංචාරක උපදේශක කමිටුවට එකදු කාන්තාවක් හෝ ඇතුලත් කර නොගැනීමෙන් කාන්තා නියෝජනය සහතික කිරීමට අගමැතිනිය දුන් සහතිකය රැකීමට රජය අපොහොසත් වී ඇත.
මීට මසකට ඉහත දී ද රජයේ ප්‍රමුඛතම තොරතුරු හා සන්නිවේදන තාක්ෂණ ආයතනය වන ශ්‍රී ලංකා තොරතුරු හා සන්නිවේදන තාක්ෂණ ආයතනය (ICTA) විසින් වත්මන් රජයේ ඩිජිටල් ආර්ථික දැක්මට අනුකූලව කෘත්‍රිම බුද්ධිය පිළිබඳ ශ්‍රී ලංකාවේ ජාතික උපාය මාර්ගයක් සකස් කිරීම උදෙසා පිරිමි දස දෙනකුගෙන් සමන්විත කෘත්‍රිම බුද්ධි (AI) උපදේශන කමිටුවක් පත් කර තිබුණි.
නමුත් විකල්ප මාධ්‍ය ඔස්සේ ආණ්ඩුවේ සර්ව පුරුෂ ප්‍රයත්නය හෙළි කිරීමෙන් අනතුරුව එම ආයතනයේ වෙබ් අඩවියට අනුව මේ වනවිට එම කමිටුවට කාන්තාවන් තිදෙනෙක් ද ඇතුලත් කිරීමට කටයුතු කර ඇත.
-අභිෂේකා වාසල බණ්ඩාර
[email protected]
සබැඳි ලිපි :