වයස අවුරුදු 18න් පහළ ආසියානු යොවුන් මලල ක්‍රීඩා තරගාවලිය මේ දිනවලදී පැවැත්වෙන්නේ සෞදි අරාබියේදීයි.
මෙවර තරගාවලිය සඳහා ශ්‍රී ලංකාව නියෝජනය කරමින් ක්‍රීඩක ක්‍රීඩිකාවන් 19 දෙනෙකුගෙන් සමන්විත කණ්ඩායමක් සහභාගි වන අතර එහිදී පළමු පදක්කම ශ්‍රී ලංකාවට දිනා දෙන්නට බාලක තුන්පිම්ම ඉසව්ව නියෝජනය කළ ජනිත් ලක්ෂාන් සමත් වුණා.
මීටර 15යි දශම 10ක දස්කමක් දැක් වූ ජනිත් එහි රිදී පදක්කම ලක්මාතාවට දිනා දුන්නා.
කෙසේ වෙතත් බාලිකා මීටර 1500 ඉසව්ව නියෝජනය කරන්නට සිටි ශ්‍රී ලංකාවේ නිදුකි ප්‍රාර්ථනා සහ අයේෂා සෙව්වන්දි අවසන් මොහොතේදී අවාසනාවන්ත ලෙස තරගයෙන් ඉවත් කර තිබීමත් කැපී පෙනෙනවා.
ශ්‍රී ලංකා කණ්ඩායම් කළමනාකරුගේ සහ පුහුණුකරුවන්ගේ වගකීම් විරහිතභාවය හේතුවෙන් නිදුකි සහ අයේෂාට නිසි වේලාවට තරග ආරම්භක ස්ථානයට යොමු කරන්නට නොහැකිව යද්දී එම ක්‍රීඩිකාවන් දෙදෙනාට සිය පළමු ජාත්‍යන්තර තරග අත්දැකීම ලබා ගැනීමේ අවස්ථාව අහිමිව ගියා.
ශ්‍රී ලංකා මලල ක්‍රීඩා බලධාරීන්ගේ නොසැලකිලිමත්කම හේතුවෙන් මෙම ක්‍රීඩිකාවන් දෙදෙනාගේ වසර ගණනාවක වෙහෙස මහන්සිය අපතේ යද්දී ජාත්‍යන්තර ධාවන පථයේදී බිඳ වැටෙන පදක්කමට වගකියන්නේ කවුරුන්ද ?
ජන්මයට වඩා පුරුද්ද ලොකු කර ගෙන සිටි මෙරට මලල ක්‍රීඩා බලධාරීන් සහ කළමනාකරුවන්ගේ වරදින් මෙලෙස ක්‍රීඩක ක්‍රීඩිකාවන් අපහසුතාවට පත් වූ අවස්ථාව ගැන HIRU RED CARD පසුගිය කාළය පුරාවටම අනාවරණය කළා.
නමුත් කණගාටුවට කරුණ වන්නේ මෙරට ක්‍රීඩාව කරවන ඇත්තන් ඒ පිළිබඳව නොදුටු දෑසින් පසුවීමයි.
| hirunews