මාධ්‍ය ක්ෂේත්‍රය වනාහි නිරන්තර අලුත් අත්හදා බැලීම්වලට හා වෙනස්කම්වලට ඉඩ හරිනු ලබන ගතික අවකාශයකි. ක්ෂේත්‍රයේ අපූරු සන්ධිස්ථානයක් සටහන් කරමින්, ශ්‍රී ලංකා රූපවාහිනී සංස්ථාවේ සිංහල ප්‍රවෘත්ති නිවේදිකාවක ලෙස සිය ගමන ඇරඹූ සරසි අධිකාරී, මෑතකදී ‘චැනල් අයි’ (Channel Eye) නාලිකාවේ ඉංග්‍රීසි ප්‍රවෘත්ති ද ඉදිරිපත් කරමින් මෙරට ද්විභාෂා ප්‍රවෘත්ති නිවේදන ඉතිහාසයේ නව පිටුවක් පෙරළීමට සමත් වූවාය. ඒ, සිංහල සහ ඉංග්‍රීසි යන භාෂා ද්විත්වයෙන්ම ප්‍රවෘත්ති ඉදිරිපත් කරන ප්‍රථම නිවේදිකාව ලෙස ඉතිහාසයට එක්වෙමිනි.
ඇගේ ගමන්මග
පන්නල ජාතික පාසලේ ආදි ශිෂ්‍යාවක් වන සරසි, සිය පාසල් අවධියේ සිටම නිවේදන කලාව කෙරෙහි දැඩි ඇල්මකින් පසුවූවාය. කුඩා කල සිටම ජ්‍යෙෂ්ඨ මාධ්‍යවේදී නදීක කරුණානායකගේ නිවේදන පුහුණු ඇකඩමියේ සාමාජිකාවක් ලෙස සම්බන්ධ වෙමින් ඇය සිය කටහඬ හා උච්චාරණ කුසලතා ඔප්නංවා ගත්තාය. ඇගේ කැපවීම හා උත්සාහය මත ජාතික රූපවාහිනී සංස්ථාව විසින් පවත්වන ලද දැඩි සම්මුඛ පරීක්ෂණ මාලාවකින් සමත්වෙමින්, ඇය සිංහල ප්‍රවෘත්ති නිවේදිකාවක ලෙස සිය වෘත්තීය දිවියට පිවිසියාය.
ඇගේ මෙම සුවිශේෂී හැරවුම් ලක්ෂ්‍යය පිළිබඳව අදහස් දක්වමින් බොහෝ දෙනෙක් ඇයට සුබ පැතුම් එක් කර තිබිණි. එහිදී අතීත ගුවන් විදුලි යුගය සිහිපත් කළ ප්‍රවීණයන් පෙන්වා දෙන්නේ, එකල ඉංග්‍රීසි ප්‍රවෘත්ති පිටපත දෙස බලා, සිංහල ප්‍රවෘත්ති නිවේදකයා විසින්ම එය එසැනින් සිංහලට පරිවර්තනය කරමින් ප්‍රවෘත්ති ඉදිරිපත් කළ අතීත ක්‍රමවේදයයි. එවකට වෙනම සිංහල පිටපතක් සකස් කර නොතිබූ බවත්, වර්තමානය වන විට තරුණ පරම්පරාවේ නිවේදිකාවන් භාෂා දෙකම හැසිරවීමේ හැකියාවෙන් යුතුව මෙම ක්ෂේත්‍රය නව මානයකට ඔසවා තබා ඇති ආකාරයත් ඔවුන් විසින් අගය කොට සලකනු ලබයි.
සිංහල මෙන්ම ඉංග්‍රීසි මාධ්‍යයන් ද එකලෙස හසුරවමින්, ජාතික රූපවාහිනී ප්‍රවෘත්ති මැදිරිය තුළ නව ඉතිහාසයක් නිර්මාණය කළ සරසි අධිකාරීගේ ඉදිරි මාධ්‍ය ගමන තවත් බොහෝ දෙනෙකුට ආභාසයක් වනු ඇත.
සටහන| කල්පනී ෂමල්කා
තිළිණි පෙරේරා තැබූ ෆේස්බුක් සටහනින්