නයිජීරියාවේ ජනගහනය මිලියන 200 කට අධික වුවද, ලිංගික හා ප්‍රචණ්ඩත්වයට ගොදුරු වූවන් වෙනුවෙන් වෙන් වූ ලිංගික අතවර පිළිබඳ උපදේශන හා ප්‍රතිකාර මධ්‍යස්ථාන (Sexual Assault Referral Centres – SARCs) ඇත්තේ 52 ක් පමණක් බව නයිජීරියානු කාන්තා කටයුතු සහ සමාජ සංවර්ධන අමාත්‍ය ඉමාන් සුලෙයිමාන්-ඊබ්‍රාහිම් (Imaan Sulaiman-Ibrahim) පවසයි.
එම ප්‍රමාණය රට පුරා සිටින වින්දිතයන්ගේ අවශ්‍යතා සපුරාලීමට කිසිසේත්ම ප්‍රමාණවත් නොවන බව පෙන්වා දෙන අමාත්‍යවරිය, මේ සඳහා විශේෂිත මධ්‍යස්ථාන, ආරක්ෂිත නවාතැන්පොළවල් සහ සම්බන්ධීකරණය කරන ලද ආධාරක සේවාවන් සඳහා වහාම ආයෝජනයන් වැඩි කළ යුතු බව ප්‍රකාශ කළාය.
ලිංගික සහ ස්ත්‍රී-පුරුෂ භාවය මත පදනම් වූ ප්‍රචණ්ඩත්වයට (SGBV) ගොදුරු වූවන්ට වෛද්‍ය ප්‍රතිකාර, උපදේශනය, පුනරුත්ථාපනය සහ අභිප්‍රේරණය ලබාදීම වෙනුවෙන් ෆෙඩරල් රජයේ කැපවීම ගැන සඳහන් කරමින් ඇය මේ බව කියා සිටියාය. කෙසේවෙතත් බොහෝ වින්දිතයන්ට ආරක්ෂිත නවාතැන්, මානසික සහය, නීතිමය ආධාර සහ ආර්ථිකමය බලගැන්වීම් ලබාගැනීමේදී තවමත් බාධාවන්ට මුහුණ දීමට සිදු වන ද බව ඇය සඳහන් කළාය.
“අපගේ වගකීම වින්දිතයන් ප්‍රචණ්ඩකාරී වාතාවරණයෙන් බේරා ගැනීමෙන් පමණක් අවසන් වන්නේ නැහැ. ඔවුන් නැවත යථා තත්ත්වයට පත් කිරීමට, ආත්ම විශ්වාසය ගොඩනඟා ගැනීමට සහ යැපෙන්නන් නොවී තමන්ගේම පයින් නැගී සිටීමට අවශ්‍ය මානසික, වෛද්‍ය, නීතිමය, පුනරුත්ථාපන සහ ආර්ථික සහයෝගය ලබාදීමට අපි කටයුතු කළ යුතුයි “
යැයි අමාත්‍යවරිය පවසන්නීය.
සමාජීය අගතිය, පලිගැනීම් පිළිබඳ බිය, ආර්ථික පරාධීනතාව සහ නීතියට ඇති සීමිත ප්‍රවේශය හේතුවෙන් බොහෝ දෙනෙකු තමන්ට සිදුවන හිංසනයන් වාර්තා කිරීමට පසුබට වන බව අමාත්‍යවරිය පෙන්වා දුන්නාය. එබැවින් රජය, නීතිය ක්‍රියාත්මක කරන ආයතන, සිවිල් සංවිධාන, ආගමික නායකයන් සහ ජනතාව එක්ව වින්දිතයන්ට රහස්‍යභාවය සුරකින, කාරුණික සහ කාර්යක්ෂම සේවාවක් ලබාදීමට එක්විය යුතු බව ඇය අවධාරණය කළාය.
2015 හිංසනයට එරෙහි පනත සහ 2003 ළමා අයිතිවාසිකම් පනත වැනි නීතිමය රාමූන් හරහා කාන්තාවන්ට සහ ළමයින්ට ප්‍රායෝගිකව ආරක්ෂාව සැලසිය යුතු බවත්, වින්දිතයන් තනි නොකර ආරක්ෂිත මධ්‍යස්ථාන ජාලය රට පුරා ව්‍යාප්ත කළ යුතු බවත් ඇය වැඩිදුරටත් කියා සිටියාය. මෙම මධ්‍යස්ථාන 52 පිහිටා ඇත්තේ ප්‍රාන්ත 25 ක සහ ෆෙඩරල් අගනුවර ප්‍රදේශයේ පමණක් වන අතර, එයින් පෙනී යන්නේ රට පුරා මෙම සේවාවන් විෂම ලෙස ව්‍යාප්ත වී ඇති බවයි.
කාන්තාවන්ට ගෞරවනීය සහ ආරක්ෂිත ජීවිතයක් නැවත ගොඩනඟා ගැනීමට අවශ්‍ය පසුබිම සකස් කිරීම උදෙසා මෙම සේවාවන් ව්‍යාප්ත කිරීම සහ ආයතනික සහයෝගීතාව ශක්තිමත් කිරීම අත්‍යවශ්‍ය බව නයිජීරියානු කාන්තා කටයුතු අමාත්‍යවරිය අවසාන වශයෙන් අවධාරණය කළාය.
සටහන | කල්පනී ෂමල්කා
මූලාශ්‍රය Womensnewstoday වෙබ්පිටුව