සෞඛ්‍ය සේවාව හුදෙක් සේවාවක් පමණක් නොව, සමාජ අවශ්‍යතාවක් බව අප මතක තබාගතයුතු අතර ම යහපත් පාලනය මෙන්ම යහපත් නියාමනය ද එම සමාජ අවශ්‍යතාව ආරක්ෂා කිරීමට සහ ප්‍රවර්ධනය කිරීමට අවශ්‍ය වන්නේ යැයි අග්‍රාමාත්‍ය හරිනි අමරසූරිය අවධාරණය කළා ය.
අග්‍රාමාත්‍යවරිය මෙම අදහස් පළ කළේ ජූලි මස 5 වන දින කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවති ශ්‍රී ලංකා වෛද්‍ය සභාවේ (SLMC) සියවස් සංවත්සර සැමරුම සහ ඊට සමගාමී ව නිල සමරු මුද්දරයක් නිකුත් කිරීමේ උත්සවය අමතමිනි.
එම අවස්ථාවේ දී වැඩි දුරටත් අදහස් දැක් වූ අග්‍රාමාත්‍යවරිය…
වෛද්‍ය සේවයේ වගකීම ඉතා තීරණාත්මකයි
”මෙය මහජනතාවට, වෛද්‍ය වෘත්තියට මෙන්ම අපේ රටට වසර 100ක සේවා සැපයීමක් සමරන අවස්ථාවක් පමණක් ම නොවෙයි; වෛද්‍ය විද්‍යාවේ දී, අපි ජීවිත් සමග කටයුතු කරන නිසා මෙම වගකීම වඩාත් තීරණාත්මක වෙනවා. දැඩි අභියෝග මධ්‍යයේ වුවත්, කොවිඩ් වසංගතය හමුවේ පවා අපගේ වෛද්‍ය සේවය පෙන්නුම් කළ කැපවීම, ශ්‍රී ලංකා සෞඛ්‍ය පද්ධතිය කෙරෙහි විශ්වාසය වඩාත් තහවුරු කරන්න හේතු වුණා.
අධ්‍යාපන අමාත්‍යවරිය ලෙස, අපගේ වෛද්‍ය අධ්‍යාපනයෙන් වඩාත් මානුෂීය, සංවේදී සහ ආචාරධාර්මයෙන් පිරුණු වෛද්‍යවරුන් බිහි කරන්නේ කොහොමද කියන කාරණය ගැන විශේෂ අවධානයක් යොමු කරන්න කියලා මම ඔබෙන් ඉල්ලා සිටිනවා. මේ ඓතිහාසික සන්ධිස්ථානයට පැමිණීමට හැකි වීම පිළිබඳව ශ්‍රී ලංකා වෛද්‍ය සභාවට මම සුබ පතනවා. අද වගේ ම ඉදිරියටත් ඔබ සමඟ සිටගන්න රජය සූදානම් බවත් මේ අවස්ථාවේදී මම කියන්න කැමැතියි.”
පැරණි නිශ්චිතතා නව සංකීර්ණතාවලට මග පාදනවා – සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස
”අද අප සිටින්නේ සෞඛ්‍ය සේවය නව පරිවර්තනයන් කරා ගමන් කරමින් පවතින කාලයක. පැරණි නිශ්චිතතාවයන් නව සංකීර්ණතාවලට මග පාදනවා. අපි විශ්වීය සෞඛ්‍ය ආවරණය, ඩිජිටල්කරණය කරන ලද වෛද්‍ය සත්කාර, ජානමය වෛද්‍ය විද්‍යාව සහ දේශසීමා හරහා වෛද්‍ය සේවා සැපයීම කරා ගමන් කරන විට, ඒ පිළිබඳ නියාමනය ද ඒ සමග ම ඉදිරියට යා යුතු වෙනවා. ශ්‍රී ලංකා වෛද්‍ය සභාව මෙම සංකීර්ණතාවලට මුහුණ නොදී සිටින්නේ නැහැ; ඇත්ත වශයෙන්ම අපි එහි කේන්ද්‍රය වෙනවා.
වෛද්‍ය වෘත්තිය නියාමනය කිරීමේදී පමණක් නොවේ, ශ්‍රී ලංකාවේ සෞඛ්‍ය සේවා සැපයීමේ දිශානතිය හැඩගැස්වීමේදී ද සෞඛ්‍ය අමාත්‍යාංශය ශ්‍රී ලංකා වෛද්‍ය සභාව ප්‍රධාන හවුල්කරුවකු ලෙස සලකනවා. වසර ගණනාවක් පුරා, බලපත්‍ර ලබා දීම, අධ්‍යාපන ප්‍රමිතීන්, වෘත්තීය සංවර්ධනය පවත්වා ගැනීම, ආචාරධර්ම අධීක්ෂණය සහ සෞඛ්‍ය සේවක සැලසුම්කරණය වැනි කරුණු සම්බන්ධයෙන් අපි එකට වැඩ කරලා තියෙනවා. මේවා සුළුපටු කාර්යයන් නෙවේ, අපගේ පුරවැසියන්ට ලබා දෙන සෞඛ්‍ය සේවාවල ගුණාත්මකභාවය, ආරක්ෂාව සහ වගවීම සහතික කරන්නේ කෙසේද යන්න මේ කාරණා මතයි තීරණය වෙන්නෙ”
මෙම අවස්ථාවට: තානාපතිවරුන්, නීතිපතිවරයා, ශ්‍රේෂ්ඨාධිකරණයේ විනිසුරුවන්, ශ්‍රී ලංකා වෛද්‍ය සභාවේ සාමාජිකයින් සහ අනෙකුත් සම්භාවනීය අමුත්තන් රැසක් ද සහභාගී වූහ.
