ලස්සන වෙන්න නම් අනිවාර්යයෙන්ම මිල අධික ආලේපන ගොඩක් ළඟ තබාගන්න ඕනෑ කියලා ඔබ හිතනවාද? එහෙම නැහැ. අපේ ගෙදර මුළුතැන්ගෙයි නිතරම දකින්න ලැබෙන පොල්තෙල් බෝතලයකත් රූපලාවන්යයට ප්රයෝජනවත් විය හැකි ගුණ රැසක් තිබෙනවා.
විශේෂයෙන්ම වියළි සම මෘදු කරගැනීම, සමට තෙතමනය ලබාදීම, නිය අවට සම රැකගැනීම වැනි සරල රූපලාවන්ය සත්කාර සඳහා පොල්තෙල් භාවිත කළ හැකියි. ඒ නිසා අතේ ඇති පොල්තෙල් බෝතලය ගැන ටිකක් වෙනස් විදිහකට හිතන්න මේ හොඳම වෙලාවක්. හැබැයි ඕනෑම ස්වභාවික ද්රව්යයක් වගේම පොල්තෙල් භාවිතයේදීත් නිවැරදි ක්රමය දැන සිටීම වැදගත්. එහෙනම්, ඔබේ දෛනික රූපලාවන්ය සත්කාරයට පොල්තෙල් එකතු කරගන්න පුළුවන් කොහොමද කියලා බලමු.
සුදු පොල්තෙල් කියන්නේ මොකක්ද?
සුදු පොල්තෙල් හෙවත් Virgin Coconut Oil යනු පොල් මදයෙන් ලබාගන්නා, සාමාන්යයෙන් අධික පිරිපහදු කිරීමකට ලක් නොකරන පොල්තෙල් වර්ගයකි. එහි සුවඳ, වර්ණය සහ නිෂ්පාදන ක්රමය අනුව විවිධ වර්ග තිබිය හැකියි.
රූපලාවන්ය සත්කාර සඳහා පොල්තෙල් භාවිත කිරීමේදී පිරිසිදු, ගුණාත්මක නිෂ්පාදනයක් තෝරාගැනීම වැදගත්. විශේෂයෙන්ම මුහුණේ හෝ සංවේදී සමේ භාවිත කරනවා නම්, මුලින්ම සමේ කුඩා ප්රදේශයක පරීක්ෂා කර බැලීම වඩාත් සුදුසුයි.
වියළි සමට පොල්තෙල් සත්කාරයක්
සම වියළි වූ විට එය රළු වීම, ඇදෙන ස්වභාවයක් දැනීම වගේ අපහසුතා ඇතිවෙන්න පුළුවන්. එවැනි අවස්ථාවල පොල්තෙල් ස්වල්පයක් සමට ආලේප කිරීමෙන් සමේ තෙතමනය රඳවාගැනීමට උපකාර විය හැකියි.
ස්නානයෙන් පසු සම තරමක් තෙත් තිබියදීම පොල්තෙල් ස්වල්පයක් අතේ ගෙන ශරීරයේ වියළි ප්රදේශවල මෘදු ලෙස ආලේප කරන්න. විශේෂයෙන් වැලමිට, දණහිස් සහ පාද වැනි වියළීමට පහසු ස්ථාන සඳහා මෙය සරල සත්කාරයක්.
ඔබට අවශ්ය නම් කෝමාරිකා ජෙල් සමඟ පොල්තෙල් ස්වල්පයක් මිශ්ර කර ශරීර සත්කාරයක් ලෙසත් භාවිත කළ හැකියි. නමුත් සමට අසාත්මිකතාවක් ඇතිවුවහොත් එය භාවිතයෙන් වළකින්න.
නියපොතුත් ලස්සනට තියාගන්න
නියපොතු ලස්සනට තබාගැනීම කියන්නේ නිය ආලේපන භාවිත කරන එක විතරක් නොවෙයි. නිය වටා ඇති සමත් හොඳින් රැකබලා ගැනීම වැදගත්.
පොල්තෙල් ස්වල්පයක් නියපොතු මත සහ නිය වටා ඇති වියළි සමේ ආලේප කර මිනිත්තු කිහිපයක් මෘදු ලෙස සම්බාහනය කරන්න. රාත්රියේ නින්දට පෙර මෙය සිදුකරනවා නම් පහසුවෙන්ම ඔබේ දෛනික සත්කාරයට එකතු කරගන්න පුළුවන්.
නියපොතු කැඩී යනවා නම් හෝ අවපැහැ ගැන්වීමක්, වේදනාවක් හෝ වෙනත් වෙනසක් දිගටම පවතිනවා නම් එය පොල්තෙල්වලින් පමණක් ප්රතිකාර කිරීමට උත්සාහ නොකර වෛද්ය උපදෙස් ලබාගැනීම වැදගත්.
ඇහිබැම සඳහාත් පොල්තෙල්?
ඝන ඇහිබැමක් ලබාගන්න පොල්තෙල් භාවිත කිරීම ගැන බොහෝ දෙනා අතර ජනප්රිය අදහස් තිබෙනවා. පොල්තෙල් මගින් ඇහිබැම අවට හිසකෙස් සහ සමට තෙතමනය ලබාදිය හැකි වුවත්, එය ඇහිබැම අනිවාර්යයෙන්ම ඝන කරවන බවට තහවුරු කළ ප්රතිකාරයක් ලෙස සැලකිය නොහැකියි.
භාවිත කරන්නට අදහස් කරන්නේ නම් පොල්තෙල් ඉතා ස්වල්පයක් පිරිසිදු ඇහිබැම මත පමණක් ආලේප කරන්න.
ඇස් තුළට තෙල් ඇතුළු නොවන ලෙස විශේෂයෙන් සැලකිලිමත් වන්න.
සමේ පැල්ලම් සහ ඉරි ගැන?
වයසට යාම, හිරු එළිය, හෝර්මෝන වෙනස්කම් සහ වෙනත් හේතු නිසා සමේ පැල්ලම් ඇතිවෙන්න පුළුවන්. ගර්භණී සමයෙන් පසු ඇතිවන සමේ ඉරිද බොහෝ කාන්තාවන්ට දක්නට ලැබෙනවා.
මෙවැනි අවස්ථාවල පොල්තෙල් ආලේප කර සම්බාහනය කිරීමෙන් සම මෘදු හා තෙතමනය සහිතව තබාගැනීමට උපකාර විය හැකියි. නමුත් දැනට ඇති පැල්ලම් හෝ සමේ ඉරි සම්පූර්ණයෙන් ඉවත් කරන ප්රතිකාරයක් ලෙස පොල්තෙල් සැලකිය නොහැකියි.
ඒ නිසා මෙවැනි ගැටලු සඳහා පොල්තෙල් භාවිත කරන්නේ නම් එය සමේ සත්කාරයක් ලෙස මිස නිශ්චිත වෛද්ය ප්රතිකාරයක් ලෙස නොසලකා භාවිත කිරීම වඩාත් සුදුසුයි.
නහර ගැට ගැසීමට පොල්තෙල්?
කකුල්වල නහර ඉදිමී, ගැටගැසී පෙනීම බොහෝ දෙනෙකුට ඇතිවන තත්ත්වයක්. එය ඇතැම් විට සෞන්දර්යාත්මක ගැටලුවක් ලෙස පෙනුණත්, සමහර අවස්ථාවල වෛද්ය අවධානය අවශ්ය තත්ත්වයක් විය හැකියි.
පොල්තෙල් ආලේප කර මෘදු ලෙස සම්බාහනය කිරීමෙන් සමට තෙතමනය ලබාදිය හැකි නමුත් නහර ගැටගැසීම සුව කරන ප්රතිකාරයක් ලෙස පොල්තෙල් භාවිත කිරීම සුදුසු නැහැ. නහර ඉදිමීම, වේදනාව, කකුල් බරවීම හෝ වෙනත් රෝග ලක්ෂණ තිබෙනවා නම් වෛද්ය උපදෙස් ලබාගැනීම වඩාත් වැදගත්.
පොල්තෙල් භාවිතයේදී මතක තබාගන්න
ස්වභාවික දෙයක් කියලා ඕනෑම ආකාරයකින් භාවිත කිරීම සුදුසු නැහැ. විශේෂයෙන් මුහුණේ තෙල් සහිත හෝ කුරුලෑ ඇතිවීමට පහසු සමක් තිබෙනවා නම් පොල්තෙල් ඇතැම් පුද්ගලයන්ට සිදුරු අවහිර කිරීම හෝ කුරුලෑ වැඩි කිරීම වැනි ගැටලු ඇති කළ හැකියි.
ඒ නිසා පළමුව සමේ කුඩා ප්රදේශයක භාවිත කර බලන්න. කැසීම, රතු වීම, දැවිල්ල හෝ වෙනත් අසාත්මික ප්රතික්රියාවක් ඇතිවුවහොත් භාවිතය නතර කරන්න.
රූපලාවන්ය සත්කාර කියන්නේ මිල අධික නිෂ්පාදන පසුපසම යාම නොවෙයි. ඔබ සතුව තිබෙන සරල දේවල් නිවැරදිව සහ ආරක්ෂිතව භාවිත කිරීමත් ඒ තරමටම වැදගත්. ඒ අතරින් පොල්තෙල් කියන්නේ සම සහ නිය රැකගැනීම වැනි සරල සත්කාර සඳහා ඔබේ දෛනික ජීවිතයට පහසුවෙන් එකතු කරගත හැකි දෙයක්.
උපදෙස් – ප්රවීණ රූපලාවන්ය ශිල්පිනී වජිරා ශ්යාමලී
සටහන – නයනා උදයංගනී
උපුටාගැනීම